Kreximentu Ekonomia TL iha 2016 Porsentu 5.3

0
157

DILI (TATOLI)—Timor Leste nia kreximentu ekonomia bazeia ba GDP (Gross Domestic Product),  iha tinan 2016 atinje porsentu 5.3, hatudu katak iha mudansa signifikativu kompara ho tinan 2015, iha de’it porsentu 4.

GDP Timor-Leste 2016, kreximentu  ekonomia  (%), iha 2015, GDP Timor-Leste 20.9, GDP Petrolíferu 46,5 no GDP la’ós  Setór Petrolíferu 4.0.

Enkuantu iha 2016, GDP Timor-Leste 0.8, GDP Petrolíferu -4,0 no GDP La’ós  Setór Petrolíferu 5.3.

Totál GDP Timor-Leste 2016 atinje 0.8% iha termu reál; primeiru, GDP setór petrolíferu DIMINUI 4.0% no segundu GDP La’ós Setór Petrolíferu aumenta ba 5.3%.

Diminuisaun GDP Setór Petrolíferu 2016; valór adisiona setór petrolíferu deminui ba 4.0% tanba volume ekstrasaun iha setór petrolíferu diminui 9.1% kompara ho 2015 (14.2% iha produsaun mina).

Nune’e, iha mós offset parsiál ba kustu intermediáriu ne’ebé mak hetan redusaun ba 20.8%. GDP Timor-Leste jeralmente hetan fluktusaun ne’eb’e signifikante husi tinan ba tinan tanba hetan afeta husi setór petrolíferu.

GDP La’ós Setór Petrolíferu-Aprosimasaun ba Despeza 2016; iha termu reál, aproximasaun ba despezas hetan kreximentu  5.3% iha 2016 kompara ho kreximentu  iha 2015 (4.0%).

Setór Públiku mak lidera mudansa ekonomia Timor-Leste no Setór Privadu hanesan kontributór segundu.

Despezas ba Setór Públiku hetan kreximentu  6.2% konsumu setór privadu aumenta ba 6.0%.

Parseiru dezenvolvimentu no asisténsia tékniku sira rekupera ba 3.2% (-18.4% iha 2015). Esportasaun sasan hetan kreximentu  110.8% (maioria suporta husi kafé ne’ebé mak sa’e toneladas rihun 8.4).Importasaun sasan no serbisu hetan kreximentu  iha 2016 (+8.2%).

Kreximentu  husi valór adisionadu 2016; atividade financial no asuránsia sa’e ba +22.0%. Ida ne’e hanesan espresaun husi “financial deepening”.

Atividade transportasaun hetan kreximentu  +21.5%. Prinsipálmente hetan suporta husi setór indústria ne’ebé relasiona ho obra públika.

Informasaun no komunikasaun atinje +13.5%. Valór adisionadu husi atividade ne’e sa’e bainhira indústria refere estabelesidu ona.

Konstrusaun +7.3%. Kreximentu  ida ne’e suporta husi atividade konstrusaun husi setór públiku.

Indikadór Trimestrál GDP La’ós Setór Petrolíferu, Aprosimasaun ba Despeza, Komparasaun husi Tinan ba Tinan (y/y); GDP la halo ajustamentu seasonal (orijinál) hatudu kreximentu  ne’ebé signifikadu iha trimester segundu iha 2016 kompara ho 2015 (17.9%). Maioria afeta husi investimentu públiku (116.1%).

Alende ida ne’e, esportasaun sasán no servisu mós hatudu kreximentu  ne’ebé signifikadu +15.3%. Kreximentu  ne’e afeta husi esportasaun kafé ne’ebé mak boot.

Presiza toma nota katak importasaun trimestrál (importasaun servisu) hatudu mudansa ne’ebé idéntiku ho despeza públiku.

Ho ida ne’e ekonomia Timor-Leste sempre hatudu flutuasaun ne’ebé boot iha trimestrál ikus. Ida ne’e afeta husi fatór institusionál no prosesu administrativu.

Nune’e mak ministériu Planu no Finansa, Diresaun Jerál Estatístika, Diresaun Nasionál Estatístika Ekonomia no Sosiál, Ekipa Kontas Nasionál lansa relatóriu Kontas Nasionál 2016 no Peskiza Atividade Emprezariál 2016 nian, iha sala konferénsia Diresaun Jerál Estatístika, Kolmera-Dili, Kinta (18/01).

Iha lansamentu ne’e, Diretór Jerál Estatístika, Elias dos Santos Ferreira informa katak haree ba dadus GDP (Gross Domestic Product), kreximentu ekonomia Timor-Leste (TL) iha 2016, porsentu 5.3 kompara ho 2015, porsentu haat.

“Entaun ida ne’e dadus ne’ebé mak di’ak maibé ita hotu hatene katak iha tempu hanesan mós ita lansa Peskiza Atividade Emprezariál.Tanbasá mak peskiza emprezariál importante? Tanba dadus husi peskiza ida ne’e mak kontribui ba ita-nia GDP,” hateten diretór Elias dos Santos.

Nia informa tan, Ita hatene katak iha ita-nia atividade survey (peskiza) ita ba entrevista ita-nia setór privadu sira iha Díli nó mós iha munisípiu hodi hatene katak sira-nia kontribuisaun, rekrutamentu ba ita-nia timoroan sira ne’ebé mak serbisu hira? depois nia kontribuisaun selu taxa ne’e ba governu hira?.

“Portantu, Ida ne’e importante tebes hodi ita-nia policy maker, ita-nia Na’i ulun sira hodi halo planu dezenvolvimentu ne’ebé mak di’ak,” nia akresenta.

Prezidente CCI-TL (Camâra de Comércio e Indústria de Timor-Leste), Oscar Lima hateten, lansamentu livru estatístika ne’e ita bele akompaña ekonomia Timor-Leste, tuun no sa’e.

Dadus ne’e Ministériu Finansa mak parseiru sira mak fornese dadus, implementa dadus sira ne’e.

“Ami hato’o ona dadus sira ne’e ba Finansa no finansa bolu mai. Ida ne’e 2016 nian, 2017 nian seidauk, aban bainrua 2017 nian sei sai, maibé ita hotu hein katak dadus ne’e mak ita bele akompaña, ita bele hatene saida mak mosu iha ita-nia rain. Ita-nia ekonomia tuun ka sa’e. Ne’e mak ita haree,” dehan Oscar Lima.

Nia hatutan: “Agora, purvolta cinco e cinco e tal pursentu ne’e normál, espera aban bainrua keta tuun tan. Se tuun tan laduun di’ak. Ita espera katak 2017 labele tuun, ita haree hanesan dadus, akompañamentu ne’ebé mak loro-loron ami akompaña bele tuun”.

Hodi reforsa: “Ida ne’e mak ita hein to’ok, depois levantamentu mak ita haree ami labele ko’alia uluk antes tempu”.

Lansamentu relatóriu Kontas Nasionál 2016 no Peskiza Atividade Emprezariál 2016 nian ne’e partisipa husi parseiru nasionál nomós internasionál sira, akademista sira, empreza telekomunikasaun sira, banku sira nomós autoridade parseria sira seluk tan.

(Jornalista: Rafy Belo)

(Editór : Manuel Pinto)

HUSIK IDA HATÁN