Kontentór Trabalhadór Timoroan Husi Korea Sul Paradu Iha Portu Tibar

0
107
Grupu traballadór timoroan ne’ebé mak servisu iha Korea Sul dada lia ho Primeiru-Ministru, Marí Alkatiri, hodi hato'o preukupasaun. Foto GPM: Samuel

DILI (TATOLI) – Kontentór sasan atu halo negósiu husi grupu trabalhadór timoroan ne’ebé mak servisu iha Korea Sul paradu iha Portu Dili durante fulan haat tanba seidauk selu taxa.

“Ami husi grupu trabalhadór timoroan ne’ebé servisu iha Korea Sul, ami nia sasan agora paradu hela iha alfándega Portu Dili. Ami rezolve iha fatin seluk ona maibé laiha solusaun mak ami mai hasoru Primeiru-Ministru atu bele fó solusaun ba problema ne’e”, tenik Diretór Montana Marítima Group, Aniceto da Silva, ba Jornalista sira iha Palásiu Governu hafoin hasoru malu ho Primeiru-Ministru, Marí Alkatiri, ohin.

Hodi esplika, kontentór ne’e iha rede tasi ne’ebé sosa iha Korea Sul hodi hala’o negósiu iha área peska ho suporta governu ho ró hodi bele lori sasan ne’e mai, alende ne’e kontentór ne’e iha mós sasan husi governu hanesan komputadór.

“Sasan sira ne’e ami sosa ho osan boot, momentu ne’eba ami hato’o ba governu atu bele suporta no governu fasilita ró ba ami. Kontentór ne’e iha rede no sasan governu balun iha laran hanesan komputadór”, dehan tan.

Grupu trabalhadór ne’ebé kompostu husi ema nain haat ne’e hato’o proukupasaun ba xefe governu hodi bele selu taxa ho presu labele aas demais tanba alende iha sasan governu iha kontentór ne’e, grupu ne’e mós atu loke negósiu hodi fó servisu ba timoroan lori abilidade ne’ebé sira hetan durante servisu iha Korea Sul.

“Taxa tenke selu duni maibé labele boot demais, tamba ami seidauk iha kapasidade atu selu nia”, katak.

Entretantu sasan sira ne’ebé grupu trabalhadór ne’e sosa ho montante osan US$20,000 maibé seidauk inklui ho osan atu selu kontentór no taxa tenke selu US$6,000.

Nune’e xefe governu fó resposta pozitivu ba proukupasaun hirak ne’e no sei responde iha tempu badak tanba tenke ko’alia ho ministériu relevante.

Programa trabalhadór timoroan ne’ebé servisu iha Korea Sul realiza husi governu anterior liuhosi Sekretáriu Estadu Polítika Formasaun, Profesionál no Empregu (SEPFOPE) no iha governu dahituk ministériu ne’e sai Sekretáriu Estadu Juventude no Traballu.

Jornalista: Julia Chatarina

Editora: Rita Almeida

HUSIK IDA HATÁN