Kontentór Doadór Ba Ministériu Livre Taxa

0
145
Enkontru Konsellu Ministru. Foto GPM

DILI, (TATOLI) – Governu liuhosi reuniaun Konsellu Ministru (KM) estraordináriu, ohin aprova tan rezolusaun governu ida atu fó livre taxa ba kontentór husi doadór nasaun seluk ne’ebé iha nesesidade ba ministériu sira.

“Situasaun ne’ebé mak ita iha, aprova ona rezolusaun ida atu kontentór husi doadór nasaun seluk ne’ebé iha alfándega bele livre husi taxa tanba sasan sira nesesidade ba ministériu balun”, tenik Sekretáriu Estadu Konsellu Ministru no Komunikasaun Sosiál, Matías Boavida, ba jornalista sira hafoin reuniaun KM estraordináriu iha Palásiu Governu, ohin.

Hodi dehan tan situasaun ne’ebé agora dadauk governu dahituk enfrenta no lei aduanéiru ne’ebé la permite, entaun governu iha hanoin atu hamosu rezolusaun ne’e tanba kontentór husi doadór 19 ne’ebé agora dadauk iha alfándega iha ekipamentu husi Servisu Autónomu Medikamentu no Ekipamentu Saúde Emprensa Públika (SAMES E.P), Polísia Nasionál Timor-Leste (PNTL) no ministériu seluk tan.

“Kontentór sira ne’e husik hela iha alfándega no governu liuhosi Ministériu Planu no Finansa hanoin importante atu halo rezolusaun ida kona-ba livre husi pagamentu kontentór sira ne’e no ekipamentu sira bele passa ba ministériu ne’ebé iha nesesidade ho kontentór sira”, katak.

Portavoz ne’e mós akresenta kontentór sira mai husi governu anterior no loloos tenke selu taxa maibé ho aprovasaun rezolusaun ne’e la presiza selu taxa tan.

Jornalista: Julia Chatarina

Editora: Rita Almeida

HUSIK IDA HATÁN