Kondisaun Alfándega Simples Los

0
254
Prezidente Komisaun E Parlamentu Nasionál (PN), Abel Pires

DILI (TATOLI)—Prezidente Komisaun E Parlamentu Nasionál (PN), Abel Pires observa, kondisaun servisu alfándega iha Portu Dili simples los, tanba ne’e, governu presiza halo intervensaun.

ʺIta labele ezije sira servisu maka’as enkuantu sira nia kondisaun servisu ladi’ak, maibé ida ne’e ita sei ko’alia oinsá atu hadi’a,ʺ Deputadu Partidu Libertasaun Populár (PLP) Abel Pires ba Jornalista Tatoli iha Portu Dili, Sesta (12/01).

“Sei uja komputadór tuan, espasu servisu ladún favoravel no problema seluk tan.”

Ekipa inspesaun kompostu hosi, Abel Pires, Deputadu, komisaun A, C , D no E, hodi haree besik liután funsionamentu no servisu operasionál ne’ebé hala’o iha portu no aeroportu.

Hafoin observa Prezidente Komisaun E Parlamentu Nasionál ne’ebé trata asuntu infraestrutura, Abel Pires konsidera inspesaun ne’ebé sira halo la’ós ho intensaun polítika, maibé atu buka identifika problema hodi rekomenda ba governu atu buka solusaun.

ʺPortu no Aeroportu servisu ida ke ninia funsionamentu integradu hanesan seguransa, alfándega, kampaña no seluk tan hanesan mós aeroportu ne’e mós hanesan tanba ne’e maka inspesaun ne’e atu hadi’a di’ak liután,ʺ Abel Pires esplika razaun.

Nune’e mós liuhosi inspesaun nu’udar parte ida, deputadu sira hodi halo fiskalizasaun ba knaar nu’udar membru Parlamentu Nasionál.

Iha inspesaun, buat ne’ebé iróniku liu tuir, Abel Pires nia haree atividade importasaun barak liu kompara ho esportasaun. Ezemplu simples, Kontetor sira tama ho sasán nakonu, no sai mamuk. signifika ita nia esportasaun ne’e menus tebes.

Ho kondisaun ida ne’e, nu’udar reprezentante povu, nia husu atu governu liu-liu Ministériu agrikultura, buka halo esforsu atu investe iha area refere nune’e bele hasae produsaun atu, Timor-Leste bele mós exporta produtu hirak ne’e ba li’ur.

(Jornalista: Agapito dos Santos)

(Editór : Manuel Pinto)

HUSIK IDA HATÁN