Komunidade Internasionál Prontu Tulun Governu

0
632
Ministru Estadu no Konseleiru Seguransa Nasionál, José Ramos Horta.

DILI (TATOLI)—Ministru Estadu no Konselleiru Seguransa Nasionál, José Ramos Horta afirma, se sétimu governu hasoru risku hanesan orsamentu la iha, nasaun sira hanesan Australia, Uniaun Europa, Portugal, Japaun, Korea Súl, Xina no Amérika prontu apoiu Timor.

“Ne’e duni, se iha risku ka instabilidade no orsamentu laiha, ha’u fiar katak nasaun sira hanesan Austrália, Uniaun Europeia, Portugal, Japaun, Korea Súl, Xina no Amérika sei apoiu Timor,” Horta hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, Sesta ne’e, hafoin enkontru ho Prezidente Repúblika, Francisco Guterres Lú Olo.

Nia promete, kontinua mobiliza apoiu internasionál nune’e bele hetan apoiu emerjénsia ruma hanesan alimentasaun, umanitáriu no orsamentu, karik akontese krize ekonomia iha Timor.

Tuir nia Governu ne’ebé lidera hosi Primeiru Ministru Mari Alkatiri hetan rekoñesementu internasionál nian tomak.

Governu iha di’ak ho rai hotu-hotu, tan ne’e sé Governu deside apoiu extra ruma mai hosi parseiru internasionál ruma, Horta fiar sei konsege tanba nasaun barak simpatia ba Governu ida ne’e, ate orgullu ho programa Governu nian (maski rejeita iha Parlamentu) no hakarak tane estabilidade iha Timor.Ho intensaun ajuda hakmaan problema iha Timor-Leste.

(Jornalista: Xisto Freitas)

(Editór : Manuel Pinto)

HUSIK IDA HATÁN