Komisaun PN Kontinua La Funsiona Hafoin Disolusaun

0
167
Deputadu sira iha Parlamentu Nasionál.

DILI (TATOLI) – Prezidente Parlamentu Nasionál (PPN), Aniceto Guterres to’o agora ladauk haruka karta ba Bankada Parlamentár hodi husu submisaun lista naran hosi bankada nian ba membru komisaun permanente, tanba ne’e komisaun seidauk funsiona.

Tuir komunikadu Aliansa Maioria Parlamentár (AMP) nian ne’ebé Tatoli hetan asesu ohin, (31/01) katak to’o ohin loron PPN, Aniceto Guterres seidauk notifika diresaun apoiu plenária parlamentár atu prepara konvokatóriu ruma hodi informa buat ruma ba bankada parlamentár sira.

Hanesan públiku hatene katak iha loron 26 Janeiru 2018 Prezidente Repúblika disolve parlamentu no dekreta eleisaun antesipada, desizaun ne’e konsidera la iha pronunsiamentu ruma hosi partidu polítiku sira. Daudaun ne’e hamosu interpretasaun la di’ak iha opiniaun públiku tanba dekretu prezidensiál la iha esplikasaun kona-ba razaun disolusaun PN no koko forma opiniaun públiku katak PN disolve deputadu sira ho terminasaun mandatu no labele halo tan servisu, ne’e konsidera la loos.

Tanba ne’e, AMP hakarak esplika ba públiku katak PR, Lu-Olo disolve ona parlamentu maibé lei artigu 100, alínea 2 Konstituisaun RDTL, hateten PN nia disolusaun la taka dalan ba deputadu sira mandatu atu kontinua nafatin to’o parlamentu nia reuniaun tuir mai. Artigu ne’e signifika katak disolusaun PN ba kuarta lejizlatura foun hahú, ne’e mós parlamentu kontinua funsiona normál to’o eleisaun antesipada remata ho rezultadu parlamentu foun hahú.

PN mós sei kontinua operasionaliza ho estabelesimentu komisaun permanente ida bazeia ba deliberasaun komisaun permanente Nu. 6/2008, 11 Agostu ne’ebé iha artigu 4 deliberasaun ne’e esplika katak komisaun permanente bele halo nia funsaun hanesan a). Reuniaun ordináriu semanálmente iha kada kuarta feira, ho oráriu katak rejimentu prevee ba reuniaun iha loron ka iha oras seluk. b) bele halo reuniaun estraordináriu komisaun permanente nian bainhira prezidente parlamentu konvoka.

Kompeténsia komisaun parlamentár nian hodi foti desizaun sira ba funsionamentu Estadu nian mós regula ona iha artigu 102 númeru 3 KRDTL ho kompeténsia sira mak hanesan a). Akompaña governu no administrasaun nia atividade, b). Koordena parlamentu nia komisaun sira jia atividade, c). Promove parlamentu nia konvokasaun kuandu presiza, d). Prepara no organiza parlamentu nia sesaun, e). Fó autorizasaun ba PR, Lu-Olo nia dezlokasaun tuir artigu 80 nia dispozisaun, f). Dirije parlamentu nia relasaun ho instituisaun analog hoai pais seluk no g). Autoriza deklarasaun ba Estadu Sítiu no Estadu Emerjénsia.

Tanba ne’e, AMP husu ba públiku atu labele rona rumoris no propaganda polítika oioin katak PN disolvidu no la la’o ona, ne’e hanoin ne’ebé la tuir konstituisaun.

Maski nune’e, PPN, Aniceto Guterres hatene didi’ak hela katak tuir loloos molok 31 Janeiru maibé to’o ohin loron PPN sei nonook hela. Tuir loloos PPN hatudu vontade hodi realiza nia promesa iha públiku deklara katak sei la halo planeia ba ajenda destituisaun PPN no Mosaun Sensura VII Governu.

Realidade PPN atuál hatudu momoos dala ida tan katak nia rasik mak lakohi ezerse nia mandatu tuir regra rejimentu sira nian. To’o agora PPN seidauk haruka karta ba bankada parlamentár hodi husu bankada sira submete lista membru komisaun permanente inklui hahú prosesa estabelesimentu komisaun permanente PN.

(Jornalista : Zezito Silva)

(Editór : Manuel Pinto)

HUSIK IDA HATÁN