KI Lansa Formasaun Komprensivu ba Mídia

0
40
Konsellu Imprensa ohin iha Timor Plaza lansa programa treinamentu jornalizmu komprensivu mídia iha siklu eleitorál Timor-Leste ba jornalista sira durante fulan neen. Foto FB Rico Junior

DILI, (TATOLI) – Konsellu Imprensa (KI) ohin lansa programa treinamentu  jornalizmu komprensivu mídia iha siklu eleitorál Timor-Leste ba jornalista mídia imprime no elektrónika  hamutuk ema 20 durante fulan neen.

“Treinamentu ne’e espesiál tebes tanba sei konsiste iha komponente haat, koñesementu profesionalizmu jornalista nian, komponente, komponente observasaun terenu hodi halo kobertura inklui komponente debate iha televizasaunʺ, dehan Prezidente Konsellu Imprensa, Virgilio Guterres, iha Timor Plaza, ohin.

Treinamentu sei hahú iha fulan-marsu to’o jullu ba jornalista sira ne’ebé selesiona hosi KI. Treinamentu ne’e bele hasae kapasidade jornalista sira atu kontribui di’ak liu ba mídia sira, tanba ne’e KI husu koperasaun dirijente órgaun komunikasaun sosiál sira  atu fasilita no  fó autorizasaun ba jornalista sira atu tuir formasaun  bainhira liu selesaun.

“Konsellu imprensa sei halo komunikasaun ho mídia nain sira hodi fasilita jornalista sira bainhira pasa iha selesaunʺ, tenik.

Tuir oráriu formasaun ne’e sei hala’o semana ida dala rua hahú tersa no kinta, tuku 14.00 to’o 17.30.

Projetu ne’e hetan apoiu fundu hosi Governu no povu Japaun, implementa husi KI no UNDP (United Nations Development Programme).

Entretantu hafoin lansamentu, tuir planu KI  ohin sei hahú distribui formulariu treinamentu ba jornalista sira hodi prenxe atu konkore ba treinamentu ne’e.

Jornalista: Agapito dos Santos

Editora: Rita Almeida

HUSIK IDA HATÁN