Karizma Salezianu Buras iha Timor

0
120
Susesór Don Bosco ba dala 10, Don Ángel Fernandéz Artime, dirije misa selebrasaun Festa Don Bosco ba dala 130 iha Igreja Maria Auxiliadora, Comoro, ohin. Imajen Mídia Palásiu PR.

DILI (TATOLI)—Susesór Don Bosco ba dala 10, Don Ángel Fernandéz Artime hateten buat ne’ebé furak no buras liu iha rai Timor ne’e tanba karizma Salezianu.

Nia informa misionáriu sira ne’ebé to’o uluk Timor iha nia rezultadu ne’ebé furak, tanba família Saleziana sira akolle misionáriu sira ne’e ho fuan ida ne’ebé nakonu ho domin.

“Furak teb-tebes tanba ita hotu bele hamutuk atu serbí ita nia oan sira no ba bendita rai ida ne’e. Ne’e duni, ita tenki harohan ba ida ne’e tanba ita hotu halo ita nia kamiñada ba moris ne’ebé di’ak,” Don Ángel hato’o lia hirak ne’e iha nia omília bainhira prezide misa selebrasaun Festa Don Bosco ba dala 130 iha Igreja Maria Auxiliadora, Comoro, Dili, kuarta ne’e.

Susesór Don Bosco ne’e kontenti tebe-tebes tanba misa selebrasaun festa Don Bosco nian família Saleziana no sarani sira barak teb-tebes.

Nia esplika katak Don Bosco la halo de’it serbisu sosiál, maibé lori labarik no joven sira besik ba Nai Maromak atu koñese di’ak liu-tan Nai Maromak. “Don Bosco prepara labarik no joven sira atu hala’o ninia kna’ar iha nia moris ba futuru ne’ebé di’ak,” nia hatutan.

Tuir Don Ángel katak labarik no joven sira iha direitu atu buka ksolok iha moris lor-loron, maibé ksolok ne’ebé la’ós superfisiál, profunda no auténtika no ida ne’ebé fó ksolok profunda ba sarani sira maka Jesus Kristu.

Líder Kongregasaun Salezianu haklaken katak sai nu’udar Kreda la’ós Kreda ne’ebé odamatan taka metin, maibé  tenke sai Amigu Don Bosco, família Saleziana ho odamatan no fuan ne’ebé nakloke.

“Ita família Saleziana barak, ne’e duni halo ita nia enkontru ho ema barak liu-tan ne’ebé mai iha ita nia fuan. Ho karizma Salezianu ne’ebé ita iha nu’udar família, ita buka atu serbí ita nia maun alin sira liu-liu sira ne’ebé nesesita,” nia hakotu.

Partisipa iha misa ne’e maka hanesan Prezidente Repúblika, Francisco Guterres Lú Olo, Eis Prezidente Repúblika, Taur Matan Ruak, Jenerál Lere Anan Timur, Komandante Jerál PNTL,  Júlio da Costa Hornay, padre, padre no sarani sira rihun ba rihun.

(Jornalista: Xisto Freitas)

(Editór : Manuel Pinto)

HUSIK IDA HATÁN