Joven Voluntarizmu Entrega Uma ba Kbiit Laek

0
99
JGV hasai foto hamutuk ho kbiit laek Domingas dos Santos hafoin entrega uma ho medida 6x4. Foto Tatoli: Rafy Belo

DILI (TATOLI)-Joven Grupu Voluntarizmu (JGV) ne´ebé nia membru reprezenta husi Munísipiu 13 iha Timor-Leste ho apoiu morál husi uma kreda katólika, Parókia Motael, Díli, entrega uma ho medida 6×4 ba kbiit laek Domingas, ne´ebé mak sira harii ho voluntáriu iha aldeia Manufuik, Ai-tarak laran, suku Kampu Alor, Díli, Domingu (07/01).

Padre Paróku Motael, Díli, Pe. David Alves da Conceição haraik bensaun ba uma kbiit laek. Foto: Mídia UNTL

JGV kompostu husi GERHANA, Klibur Humanitarian, Kaefa, GHM, Komisaun Rezervada Kapela São José Operário Ai-tarak laran lidera husi Adão do Carmo de Jesus, Estudante Suku Manelima, Postu Administrativu Laclubar, Munisípiu Manatutu no sel-seluk tan.

Reprezentante JGV, Custodio Menezes dehan katak JGV prontu nafatin oferese sira-nia aan ba komunidade sira ne’ebé presiza sira-nia tulun tuir sira-nia forsa.

“Ami seidauk iha saláriu, ami nia saláriu sei mai husi inan-aman maibé ami prontu kontribui, ba tempu ne´ebé mak ami iha,”  Reprezentante Custodio Menezes dehan tan.

Kbiit laek, Domingas dos Santos agradese. Foto Tatoli: Rafy Belo

Nia reforsa, finanseiru mak sira labele maibé kona-ba serbisu, sira prontu atu prontu serbisu iha ne´ebé de´it. “Ami kontinua nafatin atu buka dalan, ami husu públiku ajuda ami, bele fó netik lima cent, sepuluh cent hodi la´o hamutuk hodi responde no ba oin nafatin,” nia husu.

Reprezentante JGV, Custodio Menezes hateten, ajuda maluk ki’ak sira la sai obstakúlu ba sira tan sira mós konsidera katak mai mós husi família ne’ebé identiku eh hanesan tan ne’e sira iha sentimentu domin, karidade. “Ami koko buat ki´ik ne´ebé dala barak ema boot la hetan,” nia akresenta.

Razaun ida, tuir nia, sira halo nune’e tanba sente katak inan-aman sira uluk luta ona hodi defende ona Timor-Leste, tan ne’e sira hakarak la´ós atu goza de´it maibé koko, nu´udar jerasaun foun hakarak dedika aan hodi kontribui, nune´e espera bainhira sai katuas eh ferik karik, bele mós sai eroi ba dezenvolvimentu.

“La´ós ho buat ne´ebé boot maibé ho buat ne´ebé ki´ik ho domin tomak ne´ebé mak ami iha,” Reprezentante JGV, Custodio Menezes garante.

Kbiit laek ne´ebé sai benefisiáriu ba uma ne´e, Domingas dos Santos agradese tebes ba igreja katólika liu-liu Parókia Motael, JGV, patrisionadór, autoridade lokál suku Kampu Alór no komunidade sira ne´ebé ho apoia morál, téknika no finanseira hodi bele harii ona uma ne´e, durante semana rua resin de´it entrega ona ba nia.

“Ha´u kontente tebes no agradese. Ne´e valór boot tebes. Bainhira ha´u simu ha´u kontente,” Kbiit laek Domingas dos Santos agradese.

Nia hatutan: “Ha´u selu la to´o maibé ha´u sei akompaña ho orasaun atu hakmaan nafatin sira-nia isin, husu ba inan Na´i feto no Jezus atu tulun no fó salvasaun ba sira-nia vida”.

Feton husi saudozu komandante pelotaun Pedro Manuel Monteiro ne’e haktuir, voluntáriu sira esforsu aan maka’as tebes tan de’it nia maske la iha relasaun família enkuantu família rasik nunka ajuda nia. Ho programa igreja ninian, programa amu Papa ninian maun sira, alin sira, durante semana rua sira esforsu aan halo serbisu todan tebes hodi ajuda.

“Ha´u-nia maluk rasik de´it la interese ha´u, nusa mak ema ne´ebé dook, ha´u reza de´it, igreja ha´u la para ba misa, orasaun ha´u hato´o ba Na´in feto no Jezus loke ema nia fuan, ema nia kakutak, ha´u la hatene buat ida, fó sai iha kapela,” nia konta.

Kbiit laek Domingas dos Santos ne’e mós konta tan katak antes ne’e nia nunka husu ba ema ida maibé ho orasaun, loron no kalan hasa’e ba Maromak kona-ba nia susar no terus iha udan-been laran no ku’u de’it kanku hodi sustenta nia moris. Halo uma la brani.

“Ha´u fó obrigadu ba ha´u-nia oan sira, kompañia sira, seluk ha´u la temi ida por ida. Ha´u fó obrigadu, obrigadu dala ida tan. Nai Maromak sei tulun imi akompaña imi, imi nia serbisu ne´e, hahú ohin no ba oin nafatin,” nia hato’o.

Padre Paróku Motael, Díli, Pe. David Alves da Conceição dehan JGV la´ós juventude futuru maibé juventude atuál eh prezente nian. Basá, JGV hahú ona buat ruma tan ne’e amu louva inisiativa no atitude JGV sira ne’e no konsidera JGV bele sai ezemplu ida.

Nune’e nia hateten katak dalaruma amu sira ko’alia morál hodi fanun joven sira katak ita ne’e uma ka’in ida iha kristu, ita ne’e kristu nian no transmite de’it amu Papa Francisco nia hanoin katak iha tinan kbiit laek nian ita ajuda malu.

Amu ne´e mós hato´o agradesimentu ba voluntáriu sira hotu no hateten katak uma ba kbiit laek ne´e nia fó kontribuisaun transmite amu Papa nia hanoin de´it.

“Ha´u nein tau duit metan ida ba imi nia serbisu ne´e. Imi voluntariamente hasai buat ruma husi imi nia bolsu hamutuk ho komunidade sira, benfeitór sira, imi halo serbisu,” nia akresenta.

Padre Paróku Motael, Pe. David Alves da Conceição reforsa, durante serbisu ba uma kbiit laek iha Ai-tarak laran, nia la mosu mai atu haree serbisu la´o ka la la´o maibé voluntáriu sira konsege traduz nia liafuan tatoli tuir amu papa nia mensajen sai obra ida. “Ha´u fó parabéns” amu kongratula JGV.

Orsamentu ne´ebé apoia husi komunidade, autoridade lokál, kompañia, juventude sira no voluntáriu sira hodi konsege harii uma ba kbiit laek Domingas ne´e hamutuk dolár 863,00.

Katak, kontribuisaun sarani nian ho totál dolár 558,00 ne´ebé mai husi Bairu Kompi A dolár 92,00, Bairu Rai klaran dolár 32,00 no Bairo Oecusse parte Ministériu Finansa kotuk dolár 269,00.

Kontribuisaun husi estrutura Suku Kampu Alór dolár 100,00, kontribuisaun husi kompaña CALTECH dolár 15,00, kontribuisaun husi kompaña K-Link reprezenta Beni dolár 30,00 no kontribuisaun husi kompaña Kaibauk dolár 100,00.

Tuir mai, kontribuisaun husi estudante Suku Manelima, Postu Administrativu Laclubar, Munisípiu Manatutu dolár 10,00, kontribuisaun juventude Ai-tarak laran dolár 30,00 no kontribuisaun husi katekista Ai-tarak laran dolár 20,00.

Materiál ne´ebé mak iha, apoiu husi prezidente JGV, Custodio Menezes, besi baja medida 10×10 par haat, besi baja medida 6×8 par tolu, besi baja medida 5×5 par walu, besi betaun lolon 18, zinku tahan 15, baut zinku kaixa ida, ai 6×12 lolon tolu no tripleks 2mili tahan rua.

Artista timoroan na´in rua, Jovi no Cidália Gonçalves apoiu semente saka lima, Grupu Juventude Esperansa Vila Verde apoia semente saka rua.

Asosiasaun Akadémika Estudantil, Fakuldade Medisina no Siénsia Saúde (FMSS), Universidade Nasionál Timor Lorosa´e (UNTL) apoia triplek 9 mili tahan rua, zinku plat metru haat tahan ida, dobralisa par rua no vesidura par ida.

Ikus liu, apoiu materiál alimentár husi esmola parte rai klaran nian mak masin-midar kilo lima, fós saku ida, kafé pall ida, supermi kaixa ida, masako par rua no bimoli litru lima, ida.

Seluk, hafoin entrega uma ba kbiit laek ho idade 50 ne’e, JGV aprezenta drama ida ho tema ki’ak no emosionadu tebes hodi hipnotiza tiha komunidade eh sarani sira ne’ebé marka prezensa hodi sai sasin mós ba entrega uma ne’e. Nune’e, Ajénsia TATOLI observa katak kuaze ema barak tanis.

Hafoin ida ne’e JGV halo mós ezmola solidáriu hodi hetan tan fundu balun ba kbiit laek Domingas dos Santos ne’ebé hela besik mós Ministériu Finansa ne’ebé hamriik ho luxu ne’e. Kbiit laek Domingas dos Santos simu ho matan-been ksolok nian.

Entretantu, programa apoiu ba kbiit laek ne´e realiza bazea ba intensaun Amu Papa Francisco nian ne’ebé fó sai iha 19 novembru 2017 nu’udar loron eh fulan espesiál hodi tau intensaun ba kbiit laek eh vulnerável sira iha mundu.

Nune’e, iha loron 5 novembru tinan hanesan, Pe. Paróku Motael fó sai iha kapela São José Operário, Ai-tarak laran, Díli hodi husu ba sarani sira atu tau konsiderasaun ba asuntu refere. Tema ba intensaun amu Papa nian mak : Ó-nia Moris Folin Laek Bainhira La Fahe ho Ema Seluk.

(Jornalista: Rafy Belo)

(Editór : Manuel Pinto)

HUSIK IDA HATÁN