Joven Tenke Iha Kapasidade Halo Desizaun

0
308
Bispo Dioseze Díli, Dom. Virgílio do Carmo da Silva, SDB. Foto: Dioseze Díli

DILI, (TATOLI) – Bispo Dioseze Dili, Don Virgílio do Carmo da Silva, SDB, fó sakramentu krizma ba sarani atus tolu resin iha igreja Bidau Mota Klaran, sábadu (19/1) iha ámbitu komemora tinan ualu igreja São Sebastião.

“Joven la’ós de’it katak sai de’it ema boot ona. Boot ne’e katak ema ne’ebé iha kapasidade halo desizaun ba nia moris, ema ne’ebé hatene ona iha kapasidade atu hili buat ida ba nia aan. Lalika apa ama sira mak tutuir nafatin katak tolok ne’e sala, tuda ema nia kareta ne’e buat aat, baku ema, hadau ema nia sasan ne’e sala”, amu fó hanoin.

Iha kapasidade hatene hili, hatene halo asaun ba buat ne’ebé loos, ba buat ida ne’e di’ak, ida ne’e bele fó ksolok ba moris nu’udar sarani. Tan ne’e mak simu sakramentu Krisma. Sakramentu Batizmu, Eukaristia no Krizma, sakramentu tolu ne’e hanaran sakramentu inisiasaun.

“Sakramentu ne’e haburas liután ita-nia fiar, hametin liután ita-nia uniaun, hariku liután rahun di’ak oi-oin”, haklaken.

Amu esplika bainhira hala’o asaun ruma tenke hanoin uluk, la’ós halo tiha mak hanoin. Momentu saida mak joven nia moris, koko nafatin atu hadook aan, liu-liu hahalok la di’ak sira. Koko husu hodi buka dalan atu hatene hili buat ne’ebé loos no buat ne’ebé mak di’ak ba vida.

Hadi’a ita-nia moris, transforma ita-nia án hodi konkista ita nia vida. Ita tenke iha konviksaun iha laran, konsiente ita-nia frakeza no laran metin katak ita la sei la mesak. “Nakar karik ba, baruk karik ba, ema bele haree hanesan ne’e maibé fiar katak hadomi. Importante loke ita vida, loke ita moris”, amu bispu fó hanoin tan.

Hafoin sakramentu ne’e, katak tan hahú kamiñada ida, viajen moris nian, la’o nafatin ho grasa. Ida ne’e mak dehan espiritu ne’ebé sei lori nafatin atu hatudu, atu fó sasin kona-ba ita-nia identidade sarani ninian.

Ita-nia kapasidade atu hatene, atu firme iha desizaun nu’udar joven sarani ida, joven timoroan ida iha ne’ebé de’it; iha família, iha eskola, iha sosiedade. Joven tenke hatene hili buat ne’ebé loos, buat ne’ebé di’ak, buat ne’ebé santu iha moris.

“Ida ne’e razaun sorumutu ohin, iha mahein São Sebastião nian hamutuk ho krizma sira. Hamutuk ho sira ita renova ita-nia komprimísiu sarani nian. Dalabarak ita mós tama iha situasaun dilemátiku, iha dúvida, iha desizaun sira ne’ebé dalaruma ita halo”, haklaken tan.

Ema boot, ema adultu la’ós de’it tinan mak boot, isin mak boot maibé tenke hanoin mós boot, laran mós boot. Dalabarak ema balun tinan boot ona hanoin ne´e sei ki’ik, balun fali isin ne’e ki’ik, tinan ki’ik maibe hanoin boot ona.

“Buka inspira nafatin ita-nia aan atu la dezanima nu’udar joven, nu’udar sarani. Moris loro-loron dezafiu barak maibé keta dezanima. Sai juventude dala ida de’it, la dalarua, tan ne’e tenke halo vida joven sai riku ida, sai tezouru ida ba vida, halo investimentu ba vida”, katak.

Jornalista: Rafy Belo

Editora: Rita Almeida

HUSIK IDA HATÁN