Instalasaun Televizaun iha Sentru Saúde Hanesan Instrumentu Sosializa Saúde Di’ak

0
81
Vise Diretór World Food Programme (WFP), Patrick Teixeira, bainhira partisipa serimonia instralasaun televizaun iha sentru saúde Komoro, ohin. Foto Egas Cristovão

DILI, (TATOLI) – Vise Diretór World Food Programme (WFP), Patrick Teixeira, hateten televizaun no DVD hirak ne’ebé instala ona iha fasilidade saúde hanesan instrumentu hodi halo sosializasaun no promosaun saúde di’ak no prátika nutrisaun.

“Televizaun uza hodi hatudu filmajen iha fasilidade hodi hadi’a koñesimentu no promosaun kona-ba hahan saudavél oioin ba populasaun hanesan parte ida hosi programa jestaun integradu má nutrisaun aguda hosi Ministériu Saúde”, hatutan Patrick iha nia intervensaun bainhira entrega televizaun no DVD ne’ebé instala iha fasilidade saúde iha Sentru Saúde Komunitária Komoro, ohin.

Instalasaun televizaun iha fasilidade saúde ho objetivu atu dezenvolve kapasidade fasilidade saúde hodi haforsa mensajen sira relasiona ho atetude ba saúde, nutrisaun no ijiene ne’ebé di’ak, tanba ne’e WFP servisu hamutuk ho pesoál saúde no komunidade atu reduz má nutrisaun, liliu komunidade sira ne’ebé vulneravél.

Tanba ne’e, programa ida ne’e hanesan komponente parseria entre WFP ho Ministériu Saúde no KOIKA hodi kombate má nutrisaun no hadi’a saúde iha Timor-Leste.

Nune’e projetu ne’e hetan suporta hosi KOIKA no WFP suporta Ministériu Saúde hosi instala televizaun no DVD ualu iha fasilidade saúde neen iha munisípiu Dili.

Enkuantu, instalasaun televizaun ida iha postu Saúde Tasitolu hala’o iha loron 19 dezembru 2017, televizaun rua iha Sentru Saúde komunitária Komoro instala iha 19-20 dezembru 2017, televizaun ida iha Sentru Saúde Komunitária Bekora monta iha 20 dezembru 2017, televizaun ida iha Sentru Saúde Komunitária Metinaru iha 27 dezembru 2017, televizaun ida iha Sentru Saúde Vera-Cruz iha 27 dezembru 2017 no televizaun rua iha Sentru Saúde Formoza iha 28 dezembru 2017.

Ho nune’e, televizaun ida instala hamutuk ho DVD player ida, remote no USB 8GB. Nune’e instalasaun ualu iha Munisípiu Dili hanesan kontinuasaun hosi instalasaun televizaun 11 iha Bobonaro, Ermera iha 10 no Oekusi iha 11.

Televizaun hirak ne’e hanesan parte hosi Ministériu Saúde nia programa jestaun integradu ba má nutrisaun aguida moderadu ne’ebé suporta hosi WFP, KOIKA sai hanesan parseieu estratéjiku hodi esforsu kombate má nutrisaun iha Timor-Leste no fó suporta finanseiru hamutuk milaun US$ 3.6 ba projetu saúde no nutrisaun inan no oan hodi responde ba inan isin rua no inan fó susu ne’ebé sofre nutrisaun la di’ak no mós labarik tinan lima mai kraik.

Enkuantu iha 2017 labarik mane hamutuk 6.000 liu no labarik feto hamutuk 7.500 liu, inan isin rua no inan fó susu kuaze 27.000 mak hetan tratamentu má nutrisaun.

Entretantu, iha dezembru 2017, KOIKA suporta WFP no nia parseiru CARE Internasionál hodi haluan nia intervensaun ba jestaun má nutrisaun aguida moderadu iha Baukau, Vikeke no Lautein ba fulan tolu no liuhosi projetu ne’e fahe mós ai-han nutritivu espesializada ba inan isin rua no inan fó susu kuaze 4.000, nune’e hala’o sesaun informasaun kona-ba nutrisaun.

Jornalista: Zezito Silva

Editora: Rita Almeida

HUSIK IDA HATÁN