Igreja Reza ba Jornalista Sira

0
94
Padre Paróku Motael, Pe. David Alves da Conceição. Foto Tatoli: Rafy Belo

DILI, (TATOLI) – Igreja Parokia Motael liuhusi Padre Paróku Motael, Amu David Alves da Conceição, reza hodi harohan ba Maromak no husu anju Gabriel hodi sai nu´udar protetór eh mahein ba jornalista sira, tantu husi mídia imprensa, elektrónika nomós online hodi bele hala’o serbisu nu’udar mensajeiru ba sosiedade.

“Jornalista sira mak lori inspirasaun ba na’in ulun sira atu hatene. Tan ne’e ita reza ba sira”, hateten Pé. David Alves iha aldeia Manufuik, Ai-tarak laran, Suku Kampu Alor, Domingu (07/01) bainhira entrega no fó bensa ba uma kbiit laek, Domingas dos Santos.

Tuir Amu paróku jornalista sira nu’udar mensajeiru, hanesan anju São Gabriel lori liafoun hato’o ba Na’i feto Maria Virjen hodi ko’us kosok-oan naran Jesus sai maksoin mundu nian.

Tan ne´e, Amu David Alves harohan nune’e: Nai Maromak aman laran luak, Ita-boot ne’ebé haruka anju São Gabriel nu’udar mensajeiru, tan ne’e jornalista sira mós mensajeiru.

Sira lori mensajen kona-ba ema nia nesesidade, mensajen kona-ba lia di´ak ba komunidade kona-ba paz, mensajen kona-ba lia di´ak hotu ne´ebé lori ema ba dame, ba unidade.

Ita reza ba jornalista sira, tan sira fó sira-nia tempu, sira-nia preokupasaun, sira-nia interese, sira-nia karidade.

Ita-boot akompaña nafatin sira, fó bensaun liu-liu anju São Gabriel ne´ebé sai hanesan protetór, mahein ba sira atu akompaña sira iha sira-nia serbisu fatin no ba iha fatin sira ne’ebé sira la´o ba.

Jornalista Rádiu Akadémika Universidade Nasionál Timor Lorosa’e (UNTL), Miguel Gonçalves, ne’ebé partisipa iha orasaun bensaun nian ba jornalista sira hateten orasaun ne’e bensaun ida ne’ebé úniku hodi fó inspirasaun ba jornalista sira iha ámbitu sai menzajeiru ba kbiit la’ek sira no injustisa sosiál.

“Ha’u hato’o ha’u-nia apresiasaun profunda ba Padre David Alves da Conceição tanba bele haree importánsia husi jornalista sira-nian, ho liafuan maka inspiradu tebes, iha ne’ebé de’it hodi lori informasaun ba públiku”, apresia lisensiadu komunikasaun sosiál UNTL ne’e.

 Jornalista: Rafy Belo

Editora: Rita Almeida

HUSIK IDA HATÁN