Horta: Solusaun Rezolve Inpasse Polítika iha Tolu

0
270
Ministru Estadu no Konseleiru ba Seguransa Nasionál, José Ramos Horta.

DILI, (TATOLI) – Ministru Estadu no Konselleiru ba Seguransa Nasionál, José Ramos Horta, hateten solusaun atu rezolve inpasse polítika rai laran iha tolu maka bankada parlamentár sira serbisu hamutuk ho Governu, kria Governu Inkluzaun no Eleisaun Antesipada.

“Solusaun maka tolu. Ida, bankada sira iha Parlamentu Nasionál kolabora ho Governu nune’e Governu ida ne’e bele hahú implementa ninia programa. Rua, bele kria Governu seluk ida (inkluzaun) maibé nafatin FRETILIN maka lidera tanba nu’udar partidu mais votadu. Tolu, se opsaun rua ne’e la konsege atinji bele hakat ba Eleisaun Antesipada”, katak Horta ba jornalista sira iha Palásiu Prezidente Nicolau Lobato Bairru Pité, sesta ne’e hafoin soru-mutu ho Prezidente Repúblika, Francisco Guterres Lú Olo, hodi ko’alia kona-ba seguransa nasionál no inpasse polítika.

Tuir nia se Prezidente deside Eleisaun Antesipada ne’e normál tanba laiha mekanizmu ruma ne’ebé demokrátiku liu.

Iha fatin barak, nia haktuir demokrasia ne’e nune’e. Katak bainhira iha inpasse polítika maka uza meius seluk la konsege ultrapasa solusaun ikus entrega hikas ba povu hodi deside.

Ministru senior no líder istóriku ne’e hatutan Xefe Estadu sei sukat buat hotu molok foti desizaun. Iha fulan ne’e nia laran Prezidente Repúblika, Francisco Guterres Lú Olo, sei marka loron hodi kontinua konsulta ho bankada lima iha Parlamentu Nasionál atu rezolve.

Jornalista: Xisto Freitas

Editora: Rita Almeida

HUSIK IDA HATÁN