“Horta : Ema Ilegál Ho Negósiu Ilegál Barak”

0
286
José Ramos Horta.

DILI (TATOLI)-Ministru Estadu no Konselleiru ba Seguransa Nasionál (MEKSN), José Ramos Horta, observa Timor-Leste ohin loron iha infiltrasaun sidadaun estranjeiru ilegál hodi halo negósiu ilegál iha rai laran.

“La’ós ho situasaun polítika Timor-Leste mak implika ema estranjeiru barak tama ilegalmente mai iha ita nia rai, maibé dezde uluk kedan no daudaun ema rai li’ur barak tama ilegál hodi halo negósiu oioin,” Eis-Ministru Negósiu Estranjeiru, Ramos Horta ba jornalista sira hafoin enkontru Konsellu Ministru iha Palásiu Governu, Tersa (10/01/).

“Bainhira ha’u ba fronteira Sálele ha’u sente kontente tebes tanba polísia sira iha fronteira halo servisu di’ak tebes hodi situasaun iha baliza hakmatek los, maibé ema barak preokupa katak ema Indonézia barak liu mak tama ilegalmente hosi fronteira.”

Infiltrasaun sidadaun estranjeiru ilegalmente mai Timor, barak liu mai hosi nasaun Viziñu Repúblika Indonézia. Tanba ne’e, husu ba polísia imigrasaun atu halo servisu di’ak liu tan, basa polísia fronteira nia servisu iha fronteira la iha duvida, sira servisu ho professional tebe-tebes.

“Ema ilegál tama barak liu mak liuhosi Aeroportu, ne’e konsidera iha fallansu, maibé uluk setór imigrasaun haree ona. lei mós la klaru tanba ema tama mai fó vistu turista maibé to’o ikus hela metin hodi halo negósiu, loke kiosk, kiosk movel no seluk tan. Hosi sira ne’e barak liu mak mai hosi Indonézia.”

Ramos Horta husu ba ministériu relevante atu muda lei no tenke haree daudaun ona atu bele halo kontrolu di’ak liu tan ba situasaun hirak ne’e.

“Servisu imigrasaun nian, atu haree loloos, sé mak la uza vistu servisu nian, no mai ho vistu turista halo servisu iha Timor-Leste, haruka sai hosi Timor-Leste, ne’e normál tanba iha rai hotu hanesan,” Horta fó hanoin.

Entretantu, liuhosi operasaun Konjunta hosi parte imigrasaun ho inspetór traballu durante loron rua deteta ema estranjeiru hamutuk tolu nulu resin rua (32) uza vistu servisu nian hodi hala’o servisu nu’udar traballadór iha Munisípiu Baukau ho Dili.

(Jornlista : Zezito Silva)

(Editór : Manuel Pinto)

HUSIK IDA HATÁN