Harii GUN Se Governu Monu

0
383
Veteranu sira hala’o konferénsia ba imprensa iha sede CCF. Imajen Ajénsia TATOLI/Xisto Freitas.

DILI (TATOLI)—Veteranu sira hosi munisípiu 13 halo deklarasaun konjuntu iha sede Komité Sentrál FRETILIN (CCF), Comoro, Dili, Sábadu (06/01), katak sira prefere harii Governu Unidade Nasionál (GUN) bainhira Sétimu Governu Konstitusionál monu.

Governu Unidade Nasionál, tuir veteranu sira sei akumula matenek sira hosi partidu sira ne’ebé eziste iha Timor nune’e bele garante sustentabilidade governativa hodi hadi’a povu no nasaun nia moris.

“Ami husu Prezidente Repúblika atu forma Governu Unidade Nasionál,” Portavós veteranu, Guido Guterres Abel “Fitun” ba jornalista sira liuhusi konferénsia ba imprensa iha sede CCF.

Guido informa, bainhira parte kompetente sira aseita hodi forma Governu Unidade Nasionál, sira sujere partidu FRETILIN maka kontinua lidera Governu refere tanba nu’udar partidu mais votadu iha eleisaun parlamentár, tinan kotuk (2017).

“Bainhira la konsege forma Governu Unidade Nasionál, laiha dalan seluk tenke ba eleisaun antesipada tanba ida ne’e solusaun justu ida,” Fitun esklarese.

Veteranu hirak ne’e konsidera katak Sétimu Governu nia programa di’ak tebe-tebes tanba orientadu hasai povu hosi ki’ak no dezenvolve nasaun ida ne’e ba di’ak.

(Jornalista: Xisto Freitas)

(Editór : Manuel Pinto)

 

HUSIK IDA HATÁN