Halo Karidade Labele Para

0
96
Amu Paróku Motael, Pe. David Alves da Conceição fó hanoin ba sarani no komunidade sira iha aldeia Manufuik Ai-tarak laran, suku Kampu Alor, Díli, Domingu (07/01). Foto: Mídia UNTL

DILI, (TATOLI) – Padre Paróku Motael, Amu David Alves da Conceição, fó hanoin ba sarani no komunidade sira iha aldeia Manufuik Ai-tarak laran, suku Kampu Alor, domingu, (7/1) katak ita halo karidade labele para maske dalaruma ema dezafia ita.

Karidade katak ema ruma prontu fó ninia aan, ninia tempu, ninia osan, ninia enerjia, ninia fuan, ninia domin, ninia kumprensaun, ninia prontidaun atu tulun. Ne’ebé karidade ne’e la’ós ema hotu-hotu bele.

“Labele para ho obra karidade, halo nafatin ba!. Kuandu ita halo karidade, la presiza tenke loro-loron nba misa, tenke reza. Se de’it mak liuhusi uma oin ida, haree ferik ruma tuur bilan hela, la iha ema ruma atu tulun nia, ita be liu mak tulun nia. Labele hein ema seluk”, sujere amu David.

Tuir amu liuhusi ema ne’ebé mak ita tulun, Jezus Maromak oan husu ita-nia responsabilidade, Jezus mak ida ne’ebé ita haree dadauk, hatudu aan liuhusi ema seluk atu ita halo buat ruma ba. Tanba sira, Jezus mai atu salva ita, Jezus rai hela naroman ne’e mai ita.

Naroman ida ne’e la’ós de’it ba ita-nia matan hodi haree de’it rai maibé naroman ida ne’e mai ita-nia fuan, matan domin ninian atu ita haree no sente ema seluk nia terus nu’udar ita-nia terus.

Haree ema seluk nia terus, ne’e ita-nia terus hotu. Haree ema seluk nia problema ita-nia problema hotu, haree ema nia difikuldade ne’e ita-nia difikuldade, haree ema seluk nia fo’er ne’e ita-nia fo’er.

“Ne’ebé, mai ita halo ida ba seluk, seluk ba ida. Ita tenke moris iha unidade, ita tenke moris iha domin”, dehan.

Padre David Alves fó hanoin tan bainhira ita halo ona karidade la’ós hotu ona maibé kontinua no dalaruma hasoru dezafiu. Kuandu hasoru dezafiu, lalika lakon ho dezafiu, lalika rende ho dezafiu.

Dezafiu ne’e diabu ninian maibé mós dezafiu dalaruma Maromak uza atu purifika ita-nia maneira atu serbi halo didi’ak. Kuandu ema ruma soe lia hanesan ne’e, presiza ita reflete, katak tebes ha’u hanesan ne’e duni ka?

Se hanesan nia dehan refleta ha’u-nia aan, hadi’a ha’u-nia vida; se la hanesan ne’e, ha’u kontinua la’o ba oin fó ezemplu nafatin atu nia bele halo mós hanesan ha’u halo.

“Hamutuk ho ema ki’ak ita mate hanesan ema riku, ita ki’ak habelun ho ema ki’ak barak ita sei riku tebes”, katak Amu Paróku Motael.

Jornalista: Rafy Belo

Editora: Rita Almeida

HUSIK IDA HATÁN