Governu Konsidera Mosaun Sensura La’ós Interese Nasaun

0
271
Ministru Prezidensia Konsellu Ministru, Adriano do Nascimento.

DILI, (TATOLI) –  Ministru Prezidensia Konsellu Ministru, Adriano do Nascimento, hatete mosaun sensura la’ós asuntu prioridade atu diskute, tanba ne’e diskusaun ba mosaun sensura ne’ebé aprejenta hosi opozisaun sira sei debate iha loron 31 fulan ne’e.

“Tuir karta Primeiru-Ministru ba Parlamentu Nasionál, governu bele disponibiliza iha loron 31 janeiru, alende loron ida ne’e Governu sei trata asuntu nasaun no povu. Tanba buat hatun governu ne’e la’ós asuntu povu nian maibé lider polítiku sira nian”, tenik ba jornalista sira hafoin reuniaun líder bankada iha PN, sesta (12/1).

Governante ne’e haktuir debate líder bankada ohin iha diferénsia oituan, husi opozisaun hakarak halo iha tempu badak nia laran (semana oin), maibé parte governu argumenta mosaun sensura ne’e la’ós atu haree programa Governu, tanba PN seidauk aprova programa, mosaun sensura atu haree ba implementasaun programa, maibé parte opozisaun dehan interese nasionál.

Nia mós dehan, agora dadaun governu foku hela ba ezekusaun no alokasaun orsamentu duodésimu tanba orsamentu ne’e iha limitasaun atu funsiona mákina estadu nian, atu haree kontratu ba funsionáriu sira no buat seluk tan kona-ba nasaun no povu nia moris.

Kona-ba programa nia dehan tan governu dahituk prepara ona programa ho naran Programa Anotasaun tuir ezijénsia deputadu sira atu fó esplikasaun ba programa ne’e, maibé antes debate programa daruak bankada opozisaun sira aprezenta ona mosaun sensura.

Parte seluk, Xefe bankada CNRT, Arão Noe lamenta tanba reuniaun ohin la konsege ajenda mosaun sensura iha tempu badak tuir ejizénsia bankada opozisaun no semana oin laiha ajenda plenária.

“Prezidente Parlamentu Nasionál (PPN) inpoin de’it nia hakarak sein konsidera sujestaun husi bankada opozisaun sira, ida ne’e grave ba instituisaun hanesan Parlamentu Nasionál tanba laiha ajenda ba semana oin”, tenik.

Tuir nia iha asuntu barak mak órgaun hanesan PN bele rezolve, la’ós ajenda de’it ba mosaun sensura no destituisaun PPN maibé iha tan buat seluk.

“Tuir loloos sei bele ajenda antes ordem do dia atu deputadu sira bele halo deklarasaun polítika, husu atu halo substituisaun temporária ka retoma mandatu, ida ne’e importante tebes maibé ita husik ajenda laiha”, katak tan.

Entretantu haktuir iha Rejimentu PN artigu 134 mosaun sensura katak mosaun ne’e bele aprezenta hasoru Governu kona-ba ezekusaun ba programa governu ka asuntu ne’ebé relevante ho interesse nasionál.

Jornalista: Julia Chatarina

Editora: Rita Almeida

HUSIK IDA HATÁN