Governu Firme Iha PEDN

0
314
Prezidente Partidu Demokrátiku, Mariano Assanami Sabino ko'alia ho jornalista sira iha Palásiu Prezidensiál. Foto Tatoli/Xisto Freitas

ERMERA (TATOLI)—Prezidente Partidu Demokrátiku (P-PD), Mariano Assanami Sabino deklara governu ne’ebé forma hosi koligasaun Partidu Fretilín ho Partidu Demokrátiku (PD) firme nafatin atu implementa Planu Estratéjiku Dezenvolvimentu Nasionál (PEDN).

Mezmu governu ne’e minoria, entre partidu Fretilín ho Partidu Demokrátiku nia governasaun, maibé firme nafatin hodi implementa planu estratéjiku,” Ministru Estadu no Rekursu Naturais, Mariano Assanami Sabino afirma iha sosializasaun programa governu ba komunidade sira iha munisípiu Ermera, foin lalais ne’e.

Nia dehan, nu’udar jerasaun foun hametin nafatin unidade nasionál, hahú hosi situasaun difisil hodi kontra okupasaun Indonézia no agora hamutuk ho partidu Fretilín atu luta ba povu nia moris di’ak. Ho ukun ida ne’ebé nakloke no akumuladu.

Iha fatin hanesan Primeiru Ministru, Mari Alkatiri hatete,  programa governu nian, mak programa ne’ebé fó sai ona iha kampaíña eleitorál. Maibé iróniku liu mak governu nia programa Deputadu Parlamentu Nasionál hosi Opozisaun seidauk le rejeita ona.

“Ami mai ho programa no fó prioridade ba infraestrutura liuliu bé moos edukasaun, saúde, saneamentu no uma ba komunidade no seluk tan ne’ebé ho baze atu ezekuta planu estratéjiku dezenvolvimentu, maibé deputadu Aliansa Maioria Parlamentár (AMP) dehan programa inkonsisténsia no seluk tan,” Mari Alkatiri haktuir.

Enkuantu, Sekretáriu Estadu Konsellu Ministru no Komunikasaun Sosiál, Matias Boavida liuhosi komunikadu imprensa esplika, diálogu ne’ebé governu halo iha Ermera ho objetivu esplika diretamente programa governu ba komunidade, nune’e mós governu hakarak rona hosi povu, organizasaun feto, sosiedade sivíl, igreja no emprezáriu lokál sira nia aspirasaun no preokupasaun.

Atividade ne’e organiza hamutuk ho Autoridade Munisipál Ermera no hetan partisipasaun hosi Xefe Suku Ermera hamutuk 52, veteranu sira, no reprezentante komunidade sira.

(Jornalista : Zezito Silva)

(Editór : Manuel Pinto)

HUSIK IDA HATÁN