Francisco Maukura Fila Fali Ba FRETILIN

0
1457
Maukura hatudu medalla kondekorasaun ne’ebé mak simu iha loron 11 novembru 2011 iha Sentru Konvensaun Dili hosi eis Prezidente Repúblika, José Manuel Ramos Horta. Foto FB Francisco Dionisio Fernandes

DILI, (TATOLI) – Vise Kordenadór partidu Frente Mudansa munisípiu Dili, Francisco Dionisio Fernandes ‘Maukura’, ohin deklara fila hikas ba uma knua Frente Revolusionária Timor-Leste Independente (FRETILIN).

“Ha’u nia hun no abut mak Fretilin, tempu to’o ona atu fila fali ba knua, ami la’ós afilia maibé ami fila fali ba uma knua, tanba antes ne’e ha’u ema Fretilin rasik, Fretilin dezde rezisténsia kedan to’o agora”, katak eis Fundadór Frente Mudansa ba jornalista sira liuhosi konferénsia imprensa iha Praia  dos Coqeiros.

Hodi hatutan: “Dezde 2006 ha’u sees-aan hosi partidu Fretilin no 2018 ha’u hakarak fila fali ba ha’u nia hun no abut mak hanaran Fretilin, tanba antes ne’e ha’u ema Fretilin rasik no ha’u Fretilin hahú kedan iha tempu rezisténsia to’o agora”.

Afirma tan partidu istóriku mak Fretilin tanba ne’e ami hakarak deside fila fali hodi hamutuk ho Fretilin hodi kontribui ba luta povu nia moris di’ak.

“Ami fila ba Fretilin tanba partidu istóriku, mezmu partidu barak hodi demokratiza Nasaun ne’e, enkuantu partidu barak sai hanesan ita nia rikusoin”, katak nia.

Fila hikas uma knua Fretilin, nia dehan, la iha interese maibé hakarak sai militante baibain hodi kontribui no haboot liután Fretilin ba futuru sosiedade bele forte no demokrátiku.

“Ha’u hanoin tempu to’o ona fila fali ba uma knua, ha’u mai hosi família Fretilin, nune’e hanesan valór revolusionáriu no ideolizmu luta ba libertasaun pátria no povu”, hateten.

Enkuantu, tuir nia haree durante tinan 13 sees hosi Fretilin maibé partidu ne’e nia dezenvolvimentu la’o estavél no konsistente no idealizmu hirak ne’ebé di’ak.

“Dalan di’ak liu fila ba uma knua hodi hamutuk ho kamarada sira seluk hodi liberta povu no maubere oan fila ba nia abut no knua hodi hodi kontribui prosesu tomak”, katak tan.

Maske nune’e, partidu Fretilin dadaun ne’e hasoru situasaun difisíl maibé hakarak hato’o simpatia ba Primeiru-Ministru, Marí Alkatiri, no apresia tebes nia esforsu atu bele ultrapassa impase.

Atu lori militante hira ba Fretilin, nia akresenta, nu’udar fundadór ba partidu Frente Mudansa no halo kampaña ikus mai hetan pursentu tolu no eleisuan tuir mai pursentu ida ho balun.

“Ita atu klaim dehan votu ne’e ita hotu nian. Maibé ha’u ba hamutuk ho Fretilin hodi hamutuk ho kamarada sira hodi halo servisu iha baze hafoin ita haree”, realsa nia.

Ohin loron Fretilin hetan pursentu 29 no se iha duni eleisaun antesipada mak haree vitória tanba bele esforsu hodi atinje objetivu ba ukun.

Entretantu, Fretilin hanesan kultura istóriku tanba partidu ne’e mak harii Nasaun, partidu ne’ebé mak promove demokrásia, partidu ne’e mak fó inspirasaun hodi hanoin ba ukun-aan, katak tan.

Iha fatin hanesan, Eis Vise Koordenadór Frente Mudansa Munisípiu Dili, Jeferino N. Fernandes ‘Leão’ haktuir uluk haketak-aan iha estrutura Fretilin iha 2006 maibé to’o loron ida sei fila fali ba uma.

Momentu ohin ne’e sertu tebes, hanesan dirijente Frente Mudansa ida fila rasik ho konviksaun no fila rasik hodi hakarak ba fali uma knua atu hamutuk ho kamarada sira seluk atu dezenvolve partidu Fretilin di’ak liu tan, dezenvolve Nasaun no lori povu ba moris di’ak, afirma.

Jornalista: Zezito Silva

Editora: Rita Almeida

HUSIK IDA HATÁN