Forsa Defeza no Segurasa iha Tipu Operasaun Rua Ba EA

0
253
Ministru Defeza no Seguransa, José Agostinho Sequeira “Somotxo” .

DILI (TATOLI)—Ministru Defeza no Seguransa, José Agostinho Sequeira “Somotxo” hateten forsa defeza no seguransa iha tipu operasaun rua atu aplika iha eleisaun antesipada (EA).

“Imi hotu (jornalista sira) akompaña katak horsehik Komandu F-FDTL no PNTL reuni ona atu prepara lojístika, prepara tipu operasaun nune’e bele asegura eleisaun antesipada. Eleisaun antesipada nia seguransa iha tipu rua. Ida, jerál (ba territóriu Timor laran tomak) no, rua, espesiál (ba figura istóriku sira),” Somotxo hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin hala’o enkontru ho Prezidente Repúblika, Francisco Guterres Lú Olo, hodi ko’alia kona-ba situasaun seguransa no defeza rai laran.

Somotxo promote katak governu ida ne’e sei garante seguransa ba povu tomak iha eleisaun antesipada no husu povu atu hala’o serbisu hanesan baibain, lalika hanoin dehan funu ruma atu mosu fali.

“Forsa defeza no seguransa prevee situasaun sira nune’e la akontese problema ruma hafoin Prezidente Repúblika dissolve Parlamentu Nasionál no deklara eleisaun antesipada,” governante ne’e esklarese.

Nia haktuir katak buat hotu-hotu la’o di’ak, tan ne’e aproveita oportunidade hodi fó agradese ba povu tomak no polítiku sira ne’ebé la hanoin atu kria fali funu ruma iha Timor.

“Desizaun Prezidente Repúblika ne’e la halo ema ruma derrota tanba entrega hikas fali ba iha povu atu deside partidu ida ne’ebé merese atu ukun fali nasaun ne’e durante períodu ida mai ne’e,” Somotxo tenik.

(Jornalista: Xisto Freitas)

(Editór : Manuel Pinto)

HUSIK IDA HATÁN