Facebook Halo Mudansa Boot Ba News Feed

0
170
Fundadór no CEO Facebook, Mark Zuckerberg. Foto: financial Tribune.

DILI (TATOLI) – Fundadór no CEO Facebook, Mark Zuckerberg hateten facebook hahú halo mudansa boot dezde semana kotuk iha news feed (konteúdu husi kolega no fanpage ne’ebé iha koneksaun ho utilizadór), tanba ikus mai hetan komentáriu barak husi komunidade konaba konteúdu ne’ebé mosu iha pájina la-relevante ho família no kolega.

“Face book eziste hodi halo koneksaun entre ema besik liután, tanba ne’e ami sempre tau família no kolega sai prioridade iha koneksaun ne’e maibé ikus mai hetan komentáriu barak husi komunidade sira katak konteúdu públiku hanesan negósiu, marka no mídia sira espalla barak liu iha news feed duke momentu ho família no kolega”, tenik iha ninia pájina ofisiál foin lais ne’e.

Hodi dehan, iha tinan ikus ne’e vídeo no konteúdu públiku barak liu iha news feed tanba ne’e ignora buat importante husi sosiál mídia ne’ebé atu ajuda halo koneksaun entre ema.

Face book komesa halo mudansa iha tinan kotuk maibé han tempu atu finaliza. Mudansa boot ne’ebé utilizadór sei hetan iha news feed mak sei hare liu publikasaun husi família, kolega no grupu duke konteúdu públiku.

“Agora hau hakarak esklarese, ho mudansa ne’e espera katak tempu iha facebook valiuzu liu no ha’u fiar katak ida ne’e di’ak  ba utilizadór sira no ba ita nia negósiu iha tempu naruk” dehan tan.

Nune’e mós nia informa, mudansa boot mós sei akontese ba notísia, nia ho ninia ekipa produsaun garante sei fó prioridade liu ba notísia konfiável, informativu no lokal husi fontes kredivel.

Tuir nia, ikus mai iha mundu iha sensionalizmu, dezinformasaun, polarizasaun barak, enkuantu sosiál mídia permite ema atu espalha informasaun lalais liu, ne’e duni tenke hadi’a. Atualizasaun ne’e sei la muda kuantidade notísia ne’ebé utilizadór sira hare iha facebook, maibé sei muda atensaun ba notísia ne’ebé kredível no interessante husi komunidade.

“Espera katak ho atualizasaun notísia konfiavel ne’e hanesan interasaun valiozu ne’ebé ajuda utilizadór sira fó tempu ba facebook ho kualidade di’ak  hanesan haforte relasaun, envolve iha komunikasaun ativa duke konsumu pasivu no bainhira ita le notísia ida ho kualidade no husi fontes kredivel”, katak.

Antes ne’e, facebook ho sosiál mídia seluk tan hetan akuzasaun no krítika tanba  halo utilizadór sira bele hare problema sosiál no polítika iha mundu, nune’e mós sai hanesan fontes notísia falsu.

Facebook halo erru iha ninia algoritmu news feed tanba  tau atensaun liu ba notísia falsu iha pájina news feed utilizadór nó mós hetan akuzasaun fó influensia ba rezultadu eleisaun prezidente Estadus Unidus Amérika (EUA) iha tinan 2016. Alende ne’e problema konaba deferénsia vizaun polítika iha nasaun balun.

Entretantu, facebook harii iha tinan 2004 no agora daudaun sai hanesan sosiál mídia boot liu iha mundu. Lansa husi estudante universidade Harvard, Mark Zuckerberg no ninia ekipa sira no antes ne’e estudante universidade Harvard deit mak bele uza, hafoin servisu ne’e permite ba universidade rejional no ikus mai ba mundu tomak.

Agora daudaun, facebook iha utilizadór ativu hamutuk 1.968 biliaun iha mundu tomak no sei aumenta daudauk. Alende ida ne’e, hanesan empreza boot iha mundu ho renda US$36 biliaun iha Setembru 2017, ne’ebé fontes boot liu mai husi publisidade.

(Jornalista: Julia Chatarina)

(Editór : Manuel Pinto)

HUSIK IDA HATÁN