ESTV-GTI Bekora Simu Estudante Foun 335

0
57
Diretór Eskola Sekundária Tekníka Vokasionál-Grupu Teknolojia Indústria (ESTV-GTI) Bekora, Francisco Guterres.

DILI, (TATOLI) – Diretór Eskola Sekundária Tekníka Vokasionál-Grupu Teknolojia Indústria (ESTV-GTI) Bekora, Francisco Guterres, hateten estudante 335 maka hetan valór di’ak hodi estuda iha eskola ne’e ba tinan letivu 2018 to’o 2019.

Tuir dirijente ne’e katak totál kandidatu estudante foun rihun ida resin maka rejista maibé 335 maka hetan valór di’ak durante teste óral no eskrita.

“Ba tinan ida ne’e ami simu estudante foun 335 maka eskola iha ne’eʺ, dehan ba Tatoli iha Bekora, ohin.

Husi Estudante foun atus tolu resin ne’e sei koloka ba departementu  Teknolojia Informátika (IT), Eletrisidade, Mekánika Produsaun, Mekánika Autómovel, Elektrónika no Konstrusaun Sivíl.

“Departementu tolu hamutuk ema atus ida rua nulu, departementu ida 35, no departementu rua seluk simu estudante 160ʺ, tenik.

Kinta (4/1) to’o sesta, (5/1) aban ESTV-GTI mós halo re-inskrisaun ba estudante foun.

Entretantu sei hala’o orientasaun programa estudu koñesementu ambiente iha loron 8 to’o 13 janeiru.

Diretór ESTP-GTI ne’e realsa matéria orientasaun mak koñesementu jerál no espesífiku kona-ba ESTV-GTI, saúde reprodutivu sei aprejenta hosi servisu saúde komunitária postu administrativu Bekora, lei arma brankas sei aprejenta hosi polísia no taka ho misa agradesementu ba tinan letivu 2018 to’o 2019.

Tuir kalendáriu ministériu edukasaun, prosesu aprendizajen ba 2018 sei hahú iha loron 15 janeiru.

Jornalista: Agapito dos Santos

Editora: Rita Almeida

HUSIK IDA HATÁN