Estúdiu RTTL, ep La Adekuadu

0
275
Prezidente Sesante RTTL,ep, Milena Abrantes

DILI (TATOLI)—Prezidente  Konsellu Administrasaun Sesante RTTL,ep, Milena Abrantes fó sai katak estúdiu ba rádiu televizaun la adekuadu ona atu hala’o knar tanba ne’e husu atu Prezidente Konsellu foun Gil da Costa asegura infraestrutura bázika atu traballadór sira bele hala’o knar ho di’ak.

“Ohin ami hatudu estúdiu sira ne’ebé RTTL,ep iha katak importante planu ba oin mak husu ba Prezidente Konsellu Administrasaun (Gil da Costa) no membru sira atu asegura infraestrutura bázika ba instituisaun ne’e tanba ita nia edifísiu no estúdiu ba rádiu televizaun la adekuadu ona atu hala’o knar,” Milena Abrantes fó lia ne’e ba jornalista sira iha, edifísiu Rádiu Televizaun Timor-Leste, Empreza Públiku (RTTL, ep),  ohin.

Limitasaun seluk mak estúdiu RTTL,ep sei adapta sistema analog enkuantu matéria iha estúdiu barak mak kualidade high definiction (HD) ona. Nune’e nia husu atu Prezidente konsellu foun ho sekretáriu estadu konsellu ministru no komunikasaun sosiál atu tau matan ba infraestrutura bázika RTTL,ep nian.

“Dezeñu ba infraestrutura bázika temporáriu antes ne’e konsellu administrasaun prepara ona no aprezenta ona ba ministériu tutela, agora hein hela realizasaun ba dezeñu ne’e,” nia esplika progresu servisu.

Hodi kontinua dehan, durante mandatu tinan haat konsege ona implementa rejime ba traballadór RTTL,ep liuhosi prosesu naruk. Rejime traballadór empreza públika no aliterasaun dekretu lei aprovadu ona dala rua iha konsellu ministru maibé infelizmente hetan veta polítika.

“Espera katak Prezidente no membru sira bele aprezenta hikas fali atu nune’e empreza públika bele hala’o ninia knar nu’udar empreza ho di’ak,” Milena subliña.

(Jornalista: Julia Chatarina)

(Editór : Manuel Pinto)

HUSIK IDA HATÁN