Estranjeiru Nain 32 Uza Vistu Traballu Servisu Iha Baukau-Dili

0
155
Foto Espesial

DILI (TATOLI)—Liu hosi operasaun konjuntu hosi parte, imigrasaun ho inspetór traballu, durante loron rua, deteta ema estranjeiru hamutuk na’in 32 uza vistu servisu nian, hodi hala’o knaar nu’udar traballadór iha munisípiu Baukau ho Dili.

Komandante operasaun servisu imigrasaun, Inspetór Fortunato Guterres, informa husi inspesaun rotina ne’ebé hala’o dezde horisehik (Segunda) no ohin (Tersa), iha munisípiu Baukau hetan ema estranjeiru na’in 30 no Dili ema na’in 2 mak halo infrasaun vistu trabalhu.

“Iha inspesaun konjuntu ne’ebé ha’u nia elementus hala’o iha Baukau, ami deteta traballadór sira kuaze 30 resin, agora kontinua halo fiskalizasaun no kontrolu. Iha Dili, halo nafatin inspesaun no hetan ema estranjeiru sira utiliza vistu trabalhu hodi hala’o atividade professionais, ne’ebé tuir lei imigrasaun, fó servisu ba ema laiha autorizasaun,” Inspetór Fortunato Guterres esplika ba jornalista sira iha edifísiu imigrasaun Vila Verde, ohin.

Nia dehan, inspesaun ne’e lato’o de’it iha Dili no Baukau, maibé sei kobre ba munisípiu hotu no iha inspesaun sei haree mós kazamentu komponente sira (kaben ho intensaun no kontratu). Bainhira identifika ema halo violasaun, tuir lei imigrasaun foun, aplika selu koimás ba infratór sira.

“Ho tarefa ida foun ne’e, espera ema sira bele komprende lei imigrasaun ne’ebé vigor no bele minimiza halo infrasaun,” nia dehan.

Komandante ne’e mós husu ba emprezáriu sira ne’ebé utiliza traballadór estranjeiru sira ne’ebé halo servisu iha Timor-Leste, tenke kumpre lei imigrasaun foun.

“Uluk atu mai servisu iha Timor-Leste to’o ona iha ne’e mak foin halo pedidu vistu traballu mas agora ba oin tenke mai ho vistu traballu ona, tanba iha ona adidu Timor iha rai li’ur atu hare ba vistu traballadór,” Fortunato esplika aplikasaun mudansa lei imigrasaun.

(Jornalista: Julia Chatarina)

(Editór : Manuel Pinto)

HUSIK IDA HATÁN