Estoke Nesesidade Bázika Sufisiente

0
52
Foto/Google.

DILI, (TATOLI) – Diretór Nasionál Regulasaun Komersiál, Ministériu Komérsiu no Indústria (MKI), Domingos da Costa Soares, hatete estoke nesesidade bázika iha ajénsia ekonómika sira sei sufisiente ba fulan rua ka tolu mai tuir levantamentu dadus ne’ebé ekipa diresaun sira halo.

Aleinde ne’e presu ba sasán nesesáriu nian mantein nafatin hanesan baibain iha merkadu no laiha indikadór ida hatudu katak menus ai-han no folin sa’e iha tinan foun ida ne’e.

“Ba fulan rua ka tolu ba oin, ita-nia stock tantu husi parte setór privadu nian no Governu liuliu CLN, foos ho produtu balun ne’ebé ita iha sufisiente para atu halo (liuliu CLN) intervensaun merkadu direta no indireta ba fulan rua, tolu ba oin ita bele halo serbisu ida ne’e”, katak Domingos iha Bebora, Dili, ohin.

Domingos dehan diresaun halo serbisu rutina oinsá mak halo monitorizasaun, fiskalizasaun no inspesaun ba nesesidade bázika hodi haree ba estoke no presu sasán iha merkadu ba nivel nasionál, munisipál to’o postu administrativu sira.

Hatutan husi setór privadu nian iha garante tebes ba stock, signifika husi parte Governu no setór privadu bainhira iha ona garantia ba nesesidade bázika no presu ne’ebé sei estavel maka Governu sei husik merkadu ida ne’e ba sira atubele asegura nafatin merkadu nasionál ida ne’e.

“Enkuantu iha fulan tolu nian laran mak ajénsia ekonómika sira lakonsege maka ministériu sei foti medida halo intervensaun merkadu hanesan foin daudaun halo bazár baratu iha territóriu tomak hanesan asaun konkreta atu normaliza merkadu iha loron boot ne’ebé ema hotu ezije ba produtu balun ne’ebé sira atu uza iha loron boot sira ne’e, Governu konsege responde situasaun ida ne’e”.

Sobre volume sosa ne’ebé menus, Domingos hatete kompradór sira iha munisípiu tanba foin daudaun iha novembru ba kotuk mak agrikultór sira halo kolleta hanesan hare no iha pordutu alternativa balun entaun iha ai-han ne’ebé sufisiente husi sira-nia produsaun rasik nune’e bá kompra iha loja sira dalaruma menus.

“Ami-nia observasaun menus kompra tanba iha fulan-dezembru sira kompra maka’as liuliu preparasaun ba loron boot nian signifika stock ne’ebé sosa rai iha uma liuliu foos no buat sira konsome loroloron sei iha, ida ne’e parte ida husi menus kompra entaun loja sira ladún vizita”.

Iha tinan foun ne’e liga ba situasaun polítika nian, to’o agora konsumidór sira iha nivel nasionál to’o suku ema ida seidauk deklara karak menus ai-han ka presu sasán sa’e.

MKI mós sei iha estoke ne’ebé sufisiente tanba Sentru Lojístika Nasionál (CLN-sigla iha portugés) sosa ona foos iha dezembru 2017 husi Vietname ho tonelada 1800 resin atu asegura situasaun karik menus nesesidade bázika liuliu foos.

Diretór Finansa CLN, Leonel da Cruz, hatetet CLN prontu iha kualkér tempu karik akontese presu ka flutuasaun ba presu sasán liuliu foos nune’e bele halo intervensaun.

Antes ne’e polítika Governu nian liuhusi CLN tau orsamentu ho montante U$900 mil resin iha 2017 atu sosa de’it produtu lokál hanesan hare-kulit hodi redús importasaun foos husi liur, maibé importasaun foos ne’e halo tanba foos lokál seidauk sufisiente atubele sustenta nesesidade populasaun iha Timor-Leste laran tomak, nune’e dalan ida mak importa hodi asegura no substitui ai-han.

Jornalista: Maria Auxiliadora

Editora: Rita Almeida

HUSIK IDA HATÁN