Eskola 28 Novembru Preokupa Bee no Eletrisidade

0
34
Ilustrasaun

DILI, (TATOLI) – Diretór Eskola Sekundáriu 28 Novembru, Pedro da Silva Ximenes, informa ba jornalista sira katak eskola refere preokupa ba falta bee, eletrisidade nomós moru hale’u hodi asegura kondisaun no fasilita ba prosesu aprendizajen.

“Preokupasaun mak bee, eletrisidade no importante mak moru. Rehabilitasaun ida ne’e importante la halimar atu bele hala’o buat hotu-hotu”, dehan diretór Pedro da Silva iha nia kna’ar fatin, foin lalais ne’e.

Nia hatutan duut naruk ne’ebé oras ne’e hale’u hela eskola tanba prosesu aprendizajen foin mak hahú fila fali iha loron ualu janeiru 2018 hafoin férias. Nune’e fiar katak sei hadi’a eh hamoos bainhira aprendijazen atu la’o hikas.

Buat seluk fila fali mak ambiente eskola ema hakerek aat; ida ne’e efeitu husi rehabilitasaun eskola ne’ebé hatuun tiha moru i moru hirak ne’e la harii fila fali kuaze tinan rua ona, nune’e fasilita ema deskoñesidu sira tama ba ambiente eskola bainhira profesór no alunu sira fila hotu.

Eskola 28 Novembru iha duni seguransa maibé aréa ne’e luan no tempu kalan ahi la iha. “Iha oin ne’e de’it. Difísil oituan bainhira ita-nia seguransa sira iha ne’e halo pasa-revista ba mai, ba mai. Tanba ida ne’e mak iha balun, hakerek aat”, katak.

Nia hatutan dezde asume kargu nu’udar diretór eskola iha 2016 sa’e mai, ahi la iha duni no intalasaun ahi ba eskola laran mós seidauk iha.

Nune’e, bainhira rehabilitasaun fó hatene bebeik ona ba kompañia ne’ebé responsabiliza rehabilitasaun ne’e sira promote ona katak sei halo instalasaun hotu ba iha sala-de-aula hotu-hotu bainhira rehabilitasaun remata.

Até agora seidauk mosu, hein katak bainhira rehabilitasaun ne’e hotu, fiar katak sira sei halo buat ne’ebé sira promesa”, realsa.

Hodi reforsa : “La’ós ahi de’it maibé bee mós iha ne’e la iha, talvez ami ezame ami tenke hola bee, serimónia ruma ne’ebé atu halo iha eskola ami tenke hola bee mai enxe fase hariis fatin sira ne’e hodi uza. Nesesidade bázika sira ne’ebé iha eskola ne’e ita labele atende hotu tanba falta buat barak”.

Totál Funsionáriu Na’in 85

Diretór Eskola Sekundáriu 28 Novembru, Pedro da Silva Ximenes informa, totál funsionáriu iha eskola ne’e hamutuk na’in 85 nomós seguransa na’in haat, administrasaun na’in haat.

Husi númeru ne’e profesór permanente na’in 64 no kontratadu husi KFP (Komisaun Funsaun Públika) na’in no 21.

Enkuantu totál estudante, ensinu sekundáriu jerál 12o anos eskolaridade hamutuk estudante na’in 242 no Ensinu Sekundáriu Tékniku Vokasionál, Indústria no Teknolojia 12o anos eskolaridade estudante na’in 48. Kandidatu ba 1o ano eskolaridade, hamutuk estudante na’in 110.

Entretantu tuir observasaun katak alende falta bee no eletrisidade seidauk instalada hotu, rehabilitasaun ba eskola, liu-liu sala-de-aula mós balun seidauk monta odamatan no janela no janela ho odamatan  balun ne’ebé iha ona rahun fali ona no kuadru identidade eskola nian ema deskoñesidu tesi kotu hotu.

Jornalista: Rafy Belo

Editora: Rita Almeida

HUSIK IDA HATÁN