Empreza Jogu Tenke Halo Planu Negósiu

0
109
Ministru Turizmu, Manuel Vong (klaran) bainhira simu posse hosi Prezidente Repúblika iha Palásiu Prezidensiál Nicolau Lobato foin lalais ne'e. Foto dokumentasaun Tatoli

DILI, (TATOLI) – Ministru Turizmu, Manuel Vong, husu ba interesadu iha atividade negósiu jogu nian no ida ne’ebé daudaun la’o hela iha Timor-Leste tenke halo planu negósiu ida ne’ebé di’ak atubele hetan lisensa.

“Sira ne’ebé agora daudaun la’o tenke revé filafali sira-nia planu negósiu atubele asegura sustentabilidade dezenvolvimentu turizmu sustentavel”, katak Vong iha Sentru Konvensaun Dili, ohin, bainhira sorumutuk ho na’in sira ba empreza jogu nian.

Tanba ne’e nia husu ba emprezáriu jogu nian atu halo planu negósiu ne’e labele hais fali ema sira ne’ebé moris ho centavu 50 loron ida, maibé  tenke halo planu negósiu di’ak atu nune’e determina investimentu ne’ebé halo ne’e bele atinje duni investimentu nia retornu.

Ho ida ne’e empreza jogu nian hotu tenke halo planu negósiu atu tau fatin jogu nian iha ne’ebé? “Se tinan ida ne’e no tinan oin mai nia halo saida, uma hira mak nia atu halo, otél hira mak nia atu kria no reinveste duni iha ita-nia sosiedade timorense. Osan labele lori sai husi ne’e bá rai-liur, ita tenke iha kontrolu ida di’ak tanba dalabarak ita lakontrola banku, tranferénsia hira, balun iha rekening rua, tolu, ne’e ita sei regula hotu”.

Tanba ne’e mak Ministériu Turizmu sei koordena ho ministériu relevante para regula filafali atividade ne’e hodi asegura osan lasai.

“Agora daudaun sira-nia osan ne’ebé tama iha konta bankária sira-nian, ita hatama iha kontratu para osan ida ne’e labele foti. Ó-nia negósiu ida ne’e bangkrut, osan ida depozita ne’e hela ba Estadu, nune’e ita bele asegura duni ita-nia fundu ida ba turizmu hodi dezenvolve nafatin, tanba ne’e nia negósiu no prontu negósiu ba, merkadu maka determina, sé mak kliente barak prontu nia manán mas lei iha para regula ita-nia direitu no devér”.

Ministru hatutan indústria entreteneamentu tenke liga ho turizmu baze komunitária no husu kompañia jogu sira atu reinveste mós iha setór ruma tantu agrikultura, peska, no setór ne’ebé fó apoiu turizmu hanesan otél no resort.

“Ita halo buat ne’e tenke hatene komunidade hira ne’ebé besik ha’u, tenke hadi’a duni sira-nia moris, komunidade sira ne’ebé nia uma besik fatin turístiku ita hadi’a sira-nia uma, labele mai halo negósiu depois gasta osan fali iha rai-liu depois ita-nia komunidade moris padese”.

Jornalista: Maria Auxiliadora

Editora: Rita Almeida

Notísia ne’ebé relavante :

http://www.tatoli.tl/2018/01/mt-sei-regula-atividade-jogu-iha-timor-leste/

HUSIK IDA HATÁN