Embaixadora Dezignadu EUA Sei Hala’o Knar Iha Tempu Badak

0
122
Embaixadora dezignadu Estadu Unidus Amérika (EUA) ba Timor-Leste, Kathleen M. Fitzpatrick

DILI (TATOLI) – Embaixadora dezignadu Estadu Unidus Amérika (EUA) ba Timor-Leste, Kathleen M. Fitzpatrick iha tempu badak sei hala’o k’nar hafoin entrega karta kredénsial ba Estadu.

Tuir komunikadu ne’ebé dirije ba Ajénsia Tatoli, Embaixadora ne’ebé foin to’o hikas iha Dili horisehik ne’e, iha loron 18 Janeiru sei entrega kopia karta kredénsia ba Vise Ministra Negósiu, Estranjeiru no Kooperasaun (MNEK), Adaljiza Magno no tempu hanesan sei hetan mós informasaun protokolár husi MNEK.

Antes sai Embaixadora Fitzpatrick hanesan Deputy Principal Assistant Secretary iha Departamentu Intelijénsia no Peskiza (INR) Ministériu Negósiu Estranjeiru EUA nian. Antes servisu iha INR, nia mós servisu hanesan Xefe Gabinete ba Under Secretary ba Seguransa Sivíl, Demokrasia no Direitus Umanus inklui Adjuntu Asistente Sekretáriu iha Departamentu Demokrasia, Direitus Umanus no Traballu ne’ebé nia haree liu asuntu sira konaba direitus umanus, demokrasia no asuntu konaba liberdade relijioza internasionál iha Médiu Oriente, Amérika Latina no Ázia Leste.

Haktuir iha pájina ofisiál Governu EUA, iha loron 19 Jullu tinan kotuk Prezidente EUA, Donald Trump anunsia nia intensaun atu nomea Kathleen M. Fitzpatrick ne’ebé momentu ne’e hanesan Embaixadora Estraordináriu no Plenipotensiáriu EUA iha Timor-Leste.

Alende lian Ingles, Embaixadora ne’e bele ko’alia lian Españól, Frances, Rúsia, Olandés no oi tuan lian Árabe nian.

(Jornalista: Julia Chatarina)

(Editór : Manuel Pinto)

HUSIK IDA HATÁN