Embaixadór Austrália Ba TL Ramata Mandatu

0
92
Embaixadór Austrália ba Timor-Leste (TL), Peter Doyle.

DILI (TATOLI)—Embaixadór Austrália ba Timor-Leste (TL), Peter Doyle, tersa ne’e iha Palásiu Prezidente Nicolau Lobato, Bairru Pité, Dili, hala’o enkontru despedida ho Prezidente Repúblika, Francisco Guterres Lú Olo, tanba embaixadór ramata ona nia mandatu iha Timor.

“Onra boot mai ha’u hala’o enkontru despedida ho Prezidente Repúblika no aproveita ko’alia mós kona-ba relasaun Timor-Leste ho Austrália molok ha’u fila hikas ba Austrália iha semana oin,” Peter haktuir.

Nia dehan, Timor-Leste ho Austrália iha parseiru ne’ebé di’ak loos iha área defeza, seguransa no dezenvolvimentu nasionál.

“Austrália no Timor-Leste parseria iha área tomak. Xefe Estadu ho ha’u ko’alia mós prosesu konsiliasaun Austrália ho Timor-Leste kona-ba Tasi Timor no fronteira Marítima. Maibé, asuntu ida ne’e difisil oi tuan. Austrália la’ós hakarak de’it fronteira Marítima maibé hakarak konkorda asuntu tomak kona-ba oinsá dezenvolve mina no gás iha Tasi Timor inklui kampu Greater Sunrise,” Doyle esplika.

Nia informa katak Austrália no Timor-Leste sei asina tratadu foun kona-ba Tasi Timor iha fulan Marsu nia laran no iha semana ida ne’e Austrália ho Timor-Leste no Komisaun Konsiliasaun ba Delimitasaun Fronteira sei hasoru malu iha Sidney atu ko’alia kona-ba tratadu Tasi Timor.

(Jornalista: Xisto Freitas)

(Editór : Manuel Pinto)

HUSIK IDA HATÁN