EDTL Iha Jeradór 125 Paradu Hela

0
186
Ministru Adjuntu Primeiru-Ministru ba Asuntu Governasaun, José Reis, ohin halo observasaun direta ba tanki fornesementu bee moos iha Kakaulidun, Manleuana no Sumur Bor Albano Bekusi Dili. Foto GMAPM

DILI (TATOLI)—Diretór Jerál EDTL, Virgílio Guterres informa, total jeradór iha territóriu hamutuk 125 oras ne’e la halo operasaun maski barak mak sei di’ak.

“Tuir ami nia planu sei foti hotu jeradór iha territóriu laran hodi mai rai iha EDTL Komoro depois polítika sira mak deside ita fa’an ou fornese ba zona sira iha rurais, ʺ Virgílio haktuir ba Jornalista sira iha Bidau bainhira akompaña  Ministru Adjuntu Primeiru Ministru ba asuntu Governasaun, Jose Reis halo observasaun ba Sentrál EDTL Komoro no Tank bee moos Komoro no Bidau, Segunda, (15/01).

Nia dehan entre jeradór hirak ne’e, foin lalais sira entrega ona rua ba EDTL Ataúru, enkuantu sanulu iha sentrál elétrika Komoro la halo operasaun hahú kedan sentrál elétrika Hera no Betanu funsiona.

Haree ba situasaun refere Ministru Adjuntu Primeiru Ministru ba asuntu Governasaun, Jose Reis promete katak aban (Tersa) sei halo enkontru ho parte EDTL hodi buka solusaun ba jeradór atus ida resin ne’e.

“Enkontru ne’e atu rona sira nia opiniaun atu resolve problema, ita labele sai fali rai ida para ema lori sasán besi tua mai soe fali iha ita nia rai,” Ministru José Reis haktuir.

Tuir nia governu sei buka solusaun hodi uza jeradór antigu atus ida resin ne’ebé oras ne’e abandona iha territóriu Timor Leste.

(Jornalista: Agapito dos Santos)

(Editór : Manuel Pinto)

HUSIK IDA HATÁN