Edifísiu PKK Nakfilak Ba Odamatan Maromak

0
170
Amo Bispu Dioseze Díli, Dom Virgílio do Carmo da Silva akompanha husi kaben Filipe no Fernanda nomos Xefe Aldeia hodi koa fita ba inagurasaun Kapela Sagrada Familia Gricenfor. Foto: Eujevio Pereira

DILI (TATOLI)–“Tama husi Maromak nia odamatan ba, hasa’e agradese hodi hakat ba Nia kadunan ho hananu hahi Nia,” Masajen, Bispu Dioseze Dili, Dom Virgílio do Carmo, hafoin remata asina plaka Kapela Sagrada Família, iha Bairru Gricenfor, Sábadu (13/01).

Bispu Dom Virgílio dehan ba sarani Grincenfor (Grilos, Centrál no Formosa) ho sira nia halibur malu hodi harii kapela ida iha sira nia let, nu’udar sinál ida atu sarani sira renova fidelidade ba moris loro-loron nian.

Kaben Filipe no Fernanda hasai tais hodi Amo Bispu Dioseze Díli, Dom Virgílio do Carmo da Silva asina palaka. Foto: Eujevio Pereira

“Uluk fatin kanku no koperasi PKK (Pembinaan Kesejahteraan Keluarga) nian, maibé agora transforma ba fatin furak ida no husi fatin ida ne’e mak ita bele hafoun ita nia an no bele habosu ita nia an ho Maromak nia liafuan liuhosi amo sira, fatin ne’e sei sai Santo no lulik, sai fatin espirituál hodi fó forsa ba sarani sira ne’ebé ohin halibur iha fatin ida ne’e.”

Nu’udar Bibi atan ba Kreda Katólika, iha Dioseze Dili, husu nafatin atu sarani sira aproveita kapela furak ida ne’e atu halo transformasaun ba vida moris nian, hanesan Moris ho Dame iha Kristu nia laran.

Kapela Sagrada Família, la bele furak no foun iha li’ur de’it, maibé tenke reflete iha moris família nian, “sarani Gricenfor Parabéns ba ita boot sira nia esforsu maibé labele de’it furak no foun de’it iha li’ur, maibé tenke husi kapela, ba família no to’o ida- ida nia fuan no laran tanba bainhira foun, tenke hahú husi mukit nia laran mak foin sente ksolok ida los.”

Bispu lori uma kreda nia naran hato’o mós agradese ba kaben-na’in, Filipe no Fernanda ne’ebé laran di’ak ajuda ona Uma Kreda, transforma fatin PKK sai Kapela hodi fasilita sarani Gricenfor hasoru ho Maromak.

Sentimentu hanesan mós mai hosi Padre Pároku Motaél, David da Conceição, hodi dehan, sira na’in rua (Filipe ho Fernanda) diferente tebes ho emprezáriu Timor oan hotu,  sira la’ós riku ho matéria, maibé sira riku iha fuan.

“Hare didi’ak fatin ne’e no halo sai fatin hodi halibur malu no rona Maromak nia liafuan. Ha’u sente triste bainhira kapela ne’e mamuk no ai-funan sira mate,” Filipe nia lia menon ikus nia bainhira simu sentimentu agradese hosi Amu Bispu no Amu Pároku.

Istória Kapela Sagrada Família

Koordenadór Jerál Kapela Sagrada Família, José Mestre konta, fatin ne’ebé agora harii kapela ba uluk hanesan toos hodi kuda kanku, maibé ho grasa Na’i Maromak nian, ohin bele nakfila sai kapela ne’ebé furak.

Kapela Sagrada Familia Gricenfor

“Fatin ne’e uluk hanesan toos hodi kuda kanku no hudi laran, iha fatin okupasaun Indonézia tinan 1983 sai hanesan koperasi PKK no agora bele sai kapela ne’ebé furak.”

Aleinde ida ne’e, Kapela Sagrada Família, iha tempu uluk, uza mós hanesan edifísiu suku Bairru Central, maibé iha tempu ida, Padre Motaél Amu Leão, vizita bairru tanba la iha fatin atu halibur sarani sira, iha momentu hanesan deside uza fatin ne’e nu’udar katekeze.

Iha mudansa Amu Leão (Matebian) nu’udar padre pároku Motaél nian ba iha Amu Alberto Ricardo da Silva (matebian), Eis Bispu Dili, iha tinan 1990, deside kria konsellu pastorál no estasaun. Nune’e hafoin halo konsulta ho sarani suku tolu Grilos, Centrál no Formosa, Matebian Dom Ricardo deside Gricenfor sai estasaun ho naran sentru estasaun São Visente, maibé hafoin diskusaun, muda naran Sagrada Família ho estasaun Gricenfor.

Iha tinan 1994, konstrusaun kapela ki’ik ne’e komesa la’o ho osan husi koperasi PKK no mós kontribuisaun husi sarani Suku tolu, infelizmente iha tinan 1994 konsege halo selebrasaun Eukaristia iha kapela Sagrada Família dala rua de’it.

Ho grasa Maromak nian, atividade iha kapela komesa moris fali bainhira Amu David da Conçeicão sai Padre Pároku Motaél, Nia sempre marka misa iha Kuarta no Domingu datoluk kada fulan.

“Iha tempu udan bainhira Amu pároku halo misa, ami iha kapela laran hadau malu ho udan been  tanba kapela ne’e tuan ona,” José Mestre fó hanoin tan no dehan antes ne’e mós iha ona proposta ba Ministériu Solidariedade Sosiál no Sosiedade Sivíl atu ajuda orsamentu atu hadi’a kapela, maibé sidauk konsege ho razaun osan laiha.

“Ho ida ne’e, Ami uza osan cash US$ 3,000 hodi hadi’a, maibé iha loron mosu kaben-na’in ida mak ajuda konstrusaun kapela foun,” nia konta hodi hatutan kaben-na’in ne’e mak Jin Filipe ho Fernanda Oliveira na’in ba kompañia Jonize Unip, Lda no Nananiu Unip, Lda.

“Sinál agradesimentu ami nia ba sira mak, ami dedika liafuan ba sira iha plaka; “Agradecemos ao casal, pela doação da renovação da Capela Sagrada Famíli, onde as pessoas se encontram para reflexão, oração e sacramentos”.

Entretantu Kapela ne’e inaugura no bensa iha loron 13 Janeiru, husi Amu Bispu Dioseze Dili, Dom Virgílio do Carmo da Silva ho akompañamentu husi Amu Pároku Motaél, David da Conceição no amu pároku seluk tan.

(Jornalista: Julia Chatarina)

(Editór : Manuel Pinto)

HUSIK IDA HATÁN