EA Dalan Di’ak Hakotu Korrente Impasse

0
218
Ministru Estadu Konsellu Seguransa no Defeza, Dr. José Ramos Horta. Imajen Mídia Palásiu PR.

DILI (TATOLI)—Eleisaun Antisipada (EA) tuir Ministru Estadu no Konselleiru ba Seguransa Nasionál (MEKSN), José Ramos Horta, nu’udar dalan ida atu rezolve impasse polítika ne’ebé Timor hasoru daudaun.

“Ha’u hanoin ita hotu hein eleisaun antesipada tanba atu rezolve situasaun polítika tenke rezolve duni ho eleisaun antesipada, maibé desizaun iha Prezidente Repúblika nia liman,” Ramos Horta ba jornalista sira iha Palásiu Governu hafoin reuniaun Konsellu Ministru, Tersa (10/01/).

Maski antes ne’e iha Parlamentu Nasionál, xefe bankada Partidu Libertasaun Popular (PLP), Fidelis Magalhães lori Bloku Aliansa Maioria Parlamentár (BAMP) konsidera EA la’ós desizaun ne’ebé di’ak ba dezenvolvimentu Nasionál  ho razaun hirak tuir mai: EA sei perturba povu nia atividade normal ba moris di’ak; Seidauk iha lei ida mak regula kona-ba EA; Laiha razaun konstitusionál atu disolve Parlamentu Nasionál hodi hakat ba EA; Laiha orsamentu própriu ba EA; Laiha Orsamentu Jerál Estadu 2018 hodi sustenta povu nia moris, liu husi, saláriu ba funsionáriu públiku, PNTL, F-FDTL, Veteranus, Idozus, selu projetu sira, durante tinan 2018; Laiha esperiénsia EA dezde estadu RDTL eziste, maski hasoru krize polítiku iha 2006.

Ramos Horta mós fó parabéns ba AMP relasiona ho issue, AMP iha ona estrutura governu sombra (lalatak).

“Parabéns ba Aliansa Maioria Parlamentár (AMP) sira tanba sira iha ona governu lalatak, ita hein prezidente atu foti desizaun tanba nia mak iha kompeténsia atu hola medida, karik iha eleisaun antesipada ka la’e.”

Nia konsidera normal, AMP iha estrutura sombra, bainhira realiza eleisaun antisipada no povu deside sira manan eleisaun, sira bele forma governu, situasaun hirak ne’e akontese mós iha Australia.

(Jornalista : Zezito Silva)

(Editór : Manuel Pinto)

HUSIK IDA HATÁN