DNRN Rekolla Millaun Ida Resin ba Kofre Estadu

0
138

DILI, (TATOLI) – Diretór Nasionál hosi Diresaun Nasionál Rejistu Notariadu, Ministériu Justisa, João Fernando Martins Borges, hateten durante tinan 2017 diresaun ne’e rekolla osan  millaun dolar amerikanu 1,292,835 ba kofre Estadu hosi atividade emisaun pasaporte ba sidadaun.

Diretór ne’e esplika reseita ne’e kobra hosi emisaun ba pasaporte komun hamutuk millaun dolar amerikanu 1,229,015, pasaporte servisu rihun 45,300, pasaporte diplomatiku rihun 18,270 no pasaporte estranjeiru dolar amerikanu 250.

DNRN rekolla reseita ne’e hosi sidadaun rihun 21,389 maka halo emisaun pasaporte iha tinan  kotuk.

“Sidadaun ne’ebé halo pasaporte ema rihun 20,498, pasaporte servisu ema 661, pasaporte diplomatiku 227 no pasaporte estranjeiru toluʺ, dehan Diretór DNRN ba Tatoli iha nia kna’ar fatin Kolmera, ohin.

Dirijente notariadu ne’e informa ba tinan 2018 sei iha stock pasaporte eletróniku, kompostu hosi pasaporte komun, servisu, diplomatiku no estranjeiru hamutuk rihun 63.

Sidadaun 150 maka tenke hetan pasaporte komun kada loron hosi diresaun ne’e kompostu hosi feto 60, mane 60, labarik 20 no idozu sira 10.

ʺEmisaun pasaporte servisu, pasaporte diplomatiku depende pedidu hosi instituisaun Estadu sira no Ministériu Negosiu Estranjeiru no Koperasaunʺ, hatutan.

Billete identidade no  sertidaun moris obrigasaun ba sidadaun hotu tenke lori bainhira atu trata pasaporte.

Presu ba emisaun pasaporte eletróniku ho tipu urjénsia loron ida $100, ba loron tolu $75 no loron 10 $50.

Hatutan funsionáriu públiku no ajente Estadu maka iha diretu hasai pasporte servisu, pasaporte diplomatiku sei uza de’it hosi membru governu no eis titulár, pasaporte komun ba sidadaun hotu no pasaporte estranjeiru ba sidadaun estranjeiru.

Jornalista: Agapito dos Santos

Editora: Rita Almeida

HUSIK IDA HATÁN