Dezenvolve Turizmu Relijiozu Atu Hametin Fiar

0
147
Nossa Senhora iha Ramelau. Foto Google

DILI, (TATOLI) – Dezenvolve Turizmu Relijiozu sai hanesan prioridade Ministériu Turizmu (MT) iha Sétimu Governu Konstitusionál nian tanba atu hametin fiar timoaroan ne’ebé maioria ho sarani katóliku nomós sai fatin ne’ebé iha poténsia ba merkadu doméstiku nian.

Diretór Jerál Turizmu, (MT), José Dias Quintas, hatete Timor-Leste hanesan país ida ne’ebé maioria ho katóliku maka sai vantajen boot bainhira dezenvolve turizmu relijiozu iha nasaun ne’e.

“Objetivu husi turizmu relijiozu husi aspetu turizmu ne’e la’ós ita promove de’it mas objetivu importante para hametin ita-nia fiar nu’udar nasaun ida ne’ebé maioria relijiaun katólika”, katak José iha salaun igreja Katedrál, Nossa Senhora Imaculada da Conceição, domingu, (7/1).

José hatutan fatin turizmu relijiozu hanesan Kristu Rei, sai ikóniku sidade Dili nian, Nossa Senhora Aitara mós iha poténsia boot bainhira hala’o peregrinasaun iha fatin refere.

“Tanba tinan-tinan ema halo peregrinasaun bá Aitara maka Ministru Turizmu nia orientasaun liuliu ba nivel tékniku nian haree oinsá iha tinan ne’e ita komesa haree para sai hanesan produtu ida importante ita atu promove, karik ita dezenvolve iha vantajen no ponténsia ba merkadu doméstiku”.

Bainhira dezenvolve turizmu relijiozu maka sei lori ekonomia ba komunidade sira tanba ema husi munisípiu seluk sei bá fatin sira ne’e no haree husi aspetu ekonomia bele ajuda abitante sira ne’ebé hela besik iha fatin relijozu nian, bainhira ema sira bá konserteza sei presiza hahán no hemun iha fatin ne’e.

“Prioridade turizmu relijiozu nian mak peregrinasaun Nossa Senhora Aitara, no iha Hatubuiliku. Ami komesa hakbesik bá ita-nia dioseze sira oinsá bele servisu hamutuk sai parseiru Governu ho Uma-Kreda sira haree ba turizmu relijiozu. Ida ne’e sensitivu uitoan, ita tenke dezenvole ida ne’e la’ós husi aspetu ekonomia de’it, komersializa buat sira ne’e, maibé hametin fiar hanesan iha nasaun sira seluk iha Nossa Senhora de Fátima, Portugál, ne’e sai hanesan vantajen boot ba Timor-Leste atu dezenvolve ida ne’e”.

Husi perspetiva MT bainhira dezenvolve produtu ida ne’e presiza mós apoiu husi instituisaun seluk tanba turizmu área boot ida ne’ebé ko’alia sobre infraestrutura, seguransa, saúde no seluk tan.

“Kuandu Ministériu Turizmu dezenvolve produtu ida ne’e, sei servisu hamutuk ministériu relevante para fó apoiu tanba turizmu ko’alia kona-ba konetividade, movimentu ema husi fatin ida bá fatin seluk, entaun saida mak ita presiza mak liuliu dalan, bee, eletrisidade no telekomunikasaun tanba ema halo viajen bá fatin ida nia presiza komunika ba nia família, rede komunikasaun mós importante”.

Programa turizmu relijiozu atu implementa iha tinan ida ne’e, maibé depende mós ba orsamentu no espera polítiku na’in sira bele iha konsensu para programa bele la’o bá oin tanba husi parte tékniku nian importante mak ezekuta hodi bele lori benefísiu ba povu iha baze. Polítika turizmu klaru katak tenke benefisia ema rai-na’in mak sai hanesan sujeitu, tanba dezenvolvimentu ne’e tenke halai ba sira la’ós ba ema liur.

Jornalista: Maria Auxiliadora

Editora: Rita Almeida

HUSIK IDA HATÁN