Desizaun Iha PR Lú Olo Nia Liman

0
198
Líder sira hosi PD dadalia ho jornalista sira iha Palásiu Prezidente Nicolau Lobato, tersa lorokraik ne'e, hafoin enkontru ho Prezidente Repúblika. Imajen Xisto Freitas

DILI (TATOLI)–Prezidente Partidu Demokrátiku (PD), Mariano Sabino Assanami afirma, atu hakotu impasse polítika ne’ebé oras ne’e akontese, desizaun iha Prezidente Repúblika, Francisco Guterres Lú Olo nia liman.

Ba Partidu Demokrátiku, atu rezolve impasse polítika mak fó fila ba povu hodi deside, tanba realidade hatudu lider partidu polítiku sira lá konsege servisu hamutuk ona.

Povu iha konxiénsia ba multi partidária tanba ne’e mak iha eleisaun lejizlativu 2017 povu fahe nia votu ba partidu lima (FRETILIN, CNRT, PLP, PD no KHUNTO), entre partidu sira ne’e la iha ida mak manan absoluta.

“Ukun ne’e transforma mai iha partidu polítiku atu serbí fali povu. Maibé, se ita la konsege kumpre multi partidarizmu liu-liu prinsípiu ba konstrusaun Estadu, dalan ikus liu sei fila ba povu,” Assanami hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin enkontru ho Xefe Estadu Francisco Guterres Lú Olo kona-ba buka solusaun ba impasse polítika.

“Partidu no ema hotu-hotu bele fó opiniaun, maibé Prezidente Repúblika maka sei deside. PD halo tuir de’it PR nia desizaun. PD nia pozisaun maka buat ne’ebé di’ak ba povu no nasaun, ami sempre prontu para hala’o,” nia subliña.

(Jornalista: Xisto Freitas)

(Editór : Manuel Pinto)

HUSIK IDA HATÁN