CNE Hakarak Halo Edukasaun Sívika Hanesan Programa Regulár

0
53
Prezidente Komisaun Nasionál Eleisaun, Alcino Barris.

DILI, (TATOLI) – Komisaun Nasionál ba Eleisaun (CNE-sigla portugés) hakarak halo edukasaun sívika sai hanesan programa regulár atu aumenta taxa partisipasaun votante depois Prezidente Repúblika disolve Parlamentu Nasionál no anúnsiu eleisaun antesipada.

“CNE hakarak halo edukasaun sívika hanesan programa ida regulár ho desizaun Prezidente Repúblika nian disolve Parlamentu Nasionál, iha tan referénsia ida atu CNE asegura no hakarak efetua edukasaun sívika iha teritóriu no diásporu (rai-liur) atu fahe informasaun no motiva nafatin eleitór sira atu hakat fila fali ba sentru votasaun atu ezerse fali sira nia direitu votu nune’e prosesu partisipasaun ne’e bele konklui”, tenik Prezidente CNE, Alcino Barrís, ba jornalista sira iha Otél Timor, sesta, (26/1).

Hodi dehan taxa partisipasaun iha eleisaun parlamentár tinan 2017 ne’e aumenta aas kompara ho eleisaun lejislativa 2012 tanba edukasaun sívika ba votante.

“Agora ami tenta ho edukasaun sívika ne’e para mantein partisipasaun no posibilidade bele aas tanba oras ne’e ami tenta verifika hela ida ne’ebé mak la vota. Ita hatene tanba ita uza lista manuál, tanba ne’e sé mak la vota ita hatene no karik ema ne’e laiha ona (mate) karik ka ema ne’e bainhira atu vota halo hela viajen ho aviaun”, katak.

Eleisaun 2017, timoroan barak mak iha rai liur, liu-liu hanesan Inglatera no Irlándia la konsege vota tanba la konsege halo atualizasaun ba baze dadus.

“Sira molok atu vota tenke rejistu foun fali no muda sira nia hela fatin para ita loke sentru votasaun iha ne’eba atu sira bele vota”, dehan tan.

Alcino esplika sistema ne’ebé Timor-Leste adopta hela mak bele vota iha fatin unidade jeografia, seidauk bele loke atu vota iha fatin seluk maske kartaun eleitorál bele vota tanba risku. Se kuandu vota online bele, tanba kontrola aritmétikamente ema vota sistema alista ona.

Para atu evita ema vota dala ida mak tenke orienta tuir unidade jeografia. Tanba ne’e mak atualizasaun baze dadus ne’e loke to’o agora no sei mak hakarak vota iha fatin ida, nia tenke muda no vota iha fatin ne’e, labele muda tan. “Muda hela fatin muda mos kartaun, ema sempre fasilita hanesan ne’e”.

Nia dehan tan ba oin CNE sei fó konsiderasaun ba Inglatera no Irlandia tanba timoroan barak tebes. Austrália hanesan Melbourne, Sidney, Darwin, no Perth ema foin mak aumenta barak.

“Vida moris iha liur ema buka liu vida duke polítika, ita ba sira dehan hakarak vota maibé sira la vota. Maibé agora ami sei tenta fali sira ne’ebé momentu atu vota la konsege muda sira nia kartaun eleitorál no ami sei halo esforsu másimu para sira bele hetan kondisaun ne’e tanba resensiamentu ne’e obrigatóriu, maibé vota direitu ida-idak.

Jornalista: Julia Chatarina

Editora: Rita Almeida

HUSIK IDA HATÁN