Bankada PD ho PLP Hein Desizaun PR

0
141
Parlamentu Nasionál. Foto espesiál

DILI, (TATOLI) – Xefe Bankada Partidu Demokrátiku (PD), Maria Tereza Gusmão, hateten ninia parte prontu ba kualker desizaun hosi Prezidente Repúblika (PR) atu hakotu inserteza polítika.

“Kualker dezisaun Prezidente Repúblika, Partidu Demokrátiku prontu submete no halo tuir no bainhira desizaun mak dizolve Parlamentu Nasionál, Partidu Demokrátiku sei hakruk ba desizaun ne’e tanba Partidu Demokrátiku hola parte iha partidu seluk no submete hotu ba konstituisaun, Estadu no Governu”, tenik ba jornalista sira iha Parlamentu Nasionál (PN), ohin.

Hodi dehan, prinsípiu PD katak bainhira PR foti desizaun tenke desizaun ne’ebé mak favorese liu ba interesse nasaun no povu.

Agora dadaun tuir konstituisaun to’o ona tempu PR atu foti desizaun ba inserteza polítika, desde dekreta loron ba eleisaun jerál iha 22 jullu no ohin to’o ona mandatu fulan neen ba governu dahituk.

Mesmu nune’e tuir konstituisaun PR sei halo konsulta ho partidu polítiku ne’ebé iha asentu iha PN no sei prezidi reuniaun ho Konsellu Estadu atu rona opiniaun antes atu foti desizaun ba inpasse polítika ne’ebé nasaun infrenta.

Parte seluk, Xefe Bankada Partidu Libertasaun Populár (PLP) hateten kontinua hein tanba ne’e prosesu konstitusionál tanba ne’e PR sei hahú ho prosesu konsulta.

“Sekuandu Prezidente Repúblika nia desizaun mak dezolve Parlamentu Nasionál, Aliansa Maioria Parlamentár (AMP) santai de’it, dizolve uluk Parlamentu Nasionál para Governu ne’e tama Governu jestaun”, tenik Fidelis Magalhaes.

Maské nune’e, tuir nia PN bele monu maibé funsiona hela antes lejislatura foun no buat ida diferente mak eleisaun antisipada de’it.

“Kualker dezisaun mak Prezidente Repúblika foti ba ami desizaun hirak ne’e basta tuir konstituisaun. Ami husu nai Prezidente Repúblika atu halo tuir Konstituisaun Repúblika”, dehan tan.

Bainhira iha eleisaun antisipada ka la’e, povu hatene ona atu fó fiar ba se tanba ninia parte nunka manipula povu.

“Ami hein de’it, sei iha eleisaun antisipada ita ida-idak sei ba baze, sei povu deside atu kondena ami ka la fó konfiansa ba ami pasiensia tanba vida demokrátika mak nune’e”, katak.

Jornalista: Julia Chatarina

Editora: Rita Almeida

HUSIK IDA HATÁN