Avaliasaun Prioridade Dezenvolve Rttl,ep

0
336
Gil da Costa ko’alia ho Milena Abrantes, iha edifísiu RTTL,ep, Kaikoli, Dili, Segunda (29/01)

DILI (TATOLI)—Prezidente Konsellu Administrasaun Radio Televizaun Timor-Leste, Gil da Costa afirma ba futuru nia sei halo avaliasaun hamutuk ho funsionáriu sira hodi identifika prioridade saida mak importante ba dezenvolvimentu Rttl, ep.

Prioridade ne’ebé ha’u sei halo mak tenke halo avaliasaun hamutuk ho funsionáriu hotu hodi  prioridade saida mak importante liu ba RTTL, ep hafoin ita hotu foti desizaun ida ne’ebé mak di’ak liu ba futuru instituisaun ne’e,” Gil da Costa informa ba ba jornalista sira, hafoin halo primeiru vizita ba Radio Televizaun Timor-Leste, Empreza Públiku (RTTL, ep) ohin.

Nia esplika vizita ohin ba RTTL, ep objetivu ida mak atu koñese liu tan funsionáriu sira hodi nune’e bainhira nia asume knaar sei halo uluk avaliasaun ba servisu RTTL, ep hamutuk ho funsionáriu hotu.

“Nu’udar Prezidente labele foti desizaun mesak tanba desizaun tenke mai husi konsensu (anti autoritáriu) ho funsionáriu hotu para bele lori RTTL,ep ba futuru ne’ebé di’ak liu.” Gil reforsa tan.

Iha parte seluk Prezidente Konsellu Administrasaun Rádiu Televizasaun Timor-Leste (RTTL,ep), sesante, Milena Abrantes hateten mezmu nia mandatu remata ona (horisehik), maibé nia ho membru konsellu administrasaun sira sei nafatin akompaña Prezidente foun atu bele hala’o atividade balun no bainhira Prezidente foun presiza.

“Ha’u sei buka posibilidade atu atende pedidu mai husi konsellu administrasaun,” Milena promete.

Entretantu iha vizita Prezidente konsellu foun nia, Milena entrega ona aprezenta ona atividade ne’ebé nia halo durante mandatu tinan haat hanesan, rejimentu ba traballadór sira, planu orsamentu tinan 2018, inklui atividade ne’ebé sidauk konsege halo hanesan preparasaun ba kopa mundiál 2018.

Maski Milena Abrantes nia mandatu ramata ona iha loron 28 Janeiru 2018, maibé nia sei kontinua hala’o servisu lori hein toma posse ba Prezidente konsellu foun hafoin ne’e mak halo termu de entrega.

(Jornalista: Julia Chatarina)

(Editór : Manuel Pinto)

HUSIK IDA HATÁN