Austrália Sei Apoia Karau Ho Rasa Timur Mai Timor-Leste

0
169
Karau Timur. Foto/Google.

DILI, (TATOLI) – Ministru Estadu no Ministru Agrikultura no Peska (MAP), Estanislau Aleixo da Silva, hatete Austrália sei apoia karau timur 10 ho rasa foun ne’ebé dezenvolve iha país refere mai Timor-Leste iha tempu badak.

“Karau ne’e bele prodús susu-been litru 10, ita-nia Karau Timur ne’e prodús másimu litru rua ka tolu de’it. Depois mai ita halo melloramentu, ne’e duni agora ami koordena ho Austrália bainhira mak atu lori ida ne’e mai mas ami husu tan 12 tanba pelu menus lori karau inan 10, aman rua, parase sira laiha problema no iha tempu badak sei lori mai Timór”, katak Estanislau iha Palásiu Governu, ohin.

Tanba ne’e ministériu daudaun haree hela orsamentu para bele lori karau sira ne’e mai Timor-Leste.

“Karau sira ne’e fó de’it husi Governu Austrália mai ita, ita só agora selu de’it transporte para lori mai. Agora ami haree fatin sira atu tau, tenke fatin ida seguru ne’e la’ós karau baibain, ne’e rezistente ba moras ida”.

Estanislau hatutan populasaun karau iha Timor-Leste agora daudaun menus tanba moras ida (bruceloza) ne’ebé halo karau nia oan mate iha karau inan nia kabun laran.

“Ne’e mak problema boot ida iha ita rai. Karau ida agora atu lori mai ne’e rezistente, moras la da’et nia arbiru ida, ne’e duni mak lori karau mai depois tékniku sira halo melloramentu, halo inseminasaun artificial, halo kruzamentu para depois ita-nia karau mós bele sai rezistente hanesan Austrália nian”.

Jornalista: Maria Auxiliadora

Editora: Rita Almeida

HUSIK IDA HATÁN