Atividade Produsaun Masin Manatutu Lala’o

0
123
Masin. Foto/Google.

DILI, (TATOLI) – Atividade masin Manatutu ne’ebé hetan ajuda husi Ministériu Komérsiu no Indústria (MKI) liuhusi orsamentu tranferénsia públika ho montante mil U$106 ba kompañia Balak Sal, husi Manatutu daudaun ne’e seidauk iha rezultadu, nune’e ministériu prepara ona ekipa ida atu halo monitorizasaun ba empreza ne’e tanba tempu ne’ebé fó liu ona.

Ajuda ne’ebé fó iha tempu Ministériu Turizmu, Komérsiu no Indústria (MTCI) iha 2010, eis ministru Gil Alves nian ne’e lahatudu rezultadu pozitivu tanba durante sira-nia atividade produsaun ne’e foin kolleta de’it masin kuaze tonelada 10 no lakontinua kolleta to’o agora.

Diretór Jerál Indústria no Kooperativa, MKI, António da Costa, ministériu halo meiu dalabarak ona ho empreza Balak Sal hodi halo sorumutu iha munisípiu ne’ebé inklui autoridade munisípál nia hodi diskute katak kompañia prontu atu halo atividade produsaun masin ho di’ak, maibé to’o agora rezultadu lala’o ho di’ak.

“Tinan kotuk promete katak sira tenke halo mas realidade lahatudu entaun oras ne’e ami prepara ekipa ida oinsá atu tun filafali halo monitorizasaun tanba tempu ne’ebé ita fó ba nia ne’e liu ona. Monitorizasaun espesífika ba nia de’it tanba promete mas lahala’o”, katak António iha Bebora, Dili, ohin.

Ho ida ne’e mak ministériu presiza halo komunikasaun ho administradór munisípiu nian tanba masin hanesan investimentu ida no ema hotu hakarak produsaun masin sai hanesan parte ida atu suporta iha muisípiu ne’e, maibé realidade labele.

“Ne’e mak sei hasoru malu hodi define katak grupu ruma atu kontinua ka ministériu dada hodi define fali estatutu ba iha produsaun masin nian. Ami sei buka tempu ho administradór hodi haree ba kazu ida ne’e”.

Atu produsaun masin Manatutu bele la’o bá oin maka iha tinan ne’e MKI sei foti desizaun oinsá mak muda estatutu ba produsaun masin nian.

“La’ós kompañia Balak Sal ou sé nia kontinua entaun tenke hatudu rezultadu ne’ebé sai evidénsia katak nia bele mas realidade tinan hirak nia laran lahadutu evidénsia katak nia halo. Ida ne’e mak sai faktu ida no ministériu hamutuk ho administradór atu ko’alia meiu saida mak bele funsiona fali masin tanba nia poténsia di’ak tebes kompara ho munisípiu seluk, nia área kapa’as no sei bele fornese masin ba Timór laran tomak”.

Nune’e iha semana oin ekipa sei tun ba munisípiu hodi haree no inisia ho hanoin foun atubele muda situasaun ne’e no haree ba kapasidade empreza nian katak bele ka ka’e la’e, bainhira labele ministériu buka meiu tenke dada hodi define ida ne’e atu sai empreza ka grupu produsaun ida ne’ebé tau-matan direta husi MKI no munisípiu.

Jornalista: Maria Auxiliadora

Editora: Rita Almeida

Notísia ne’ebé relasiona :

http://www.tatoli.tl/2017/08/mkia-sei-hapara-atividade-kompania-balak-sal/

HUSIK IDA HATÁN