Asosiasaun Antigu Alunu Salezianu Don Bosco Konvida PR Lú Olo

0
143

DILI, (TATOLI) – Prezidente Asosiasaun Antigu Alunu Salezianu Don Bosco, Agostinho Gonçalves, ho nia estrutura konvida Prezidente Repúblika (PR), Francisco Guterres Lú Olo, hanesan antigu alunu Salezianu Don Bosco atu partisipa festa Don Bosco nian ne’ebé sei hala’o iha Don Bosco Komoro, 31 janeiru 2018.

Iha festa Don Bosco nian ne’e,  Agostinho hatete sei hola parte mós Reitór-Mor Salezianu Don Bosco, Padre Ángel Fernández Artime, ne’ebé sei mai vizita Timor-Leste hahú iha aban (30 janeiru) to’o 5 fevereiru.

“Prezidente Repúblika orgullu ho konvite ne’e no sei disponível atu partisipa iha festa Don Bosco nian iha ámbitu vizita hosi susesór Don Bosco ba dala sanulu ne’e”, hato’o Gonçalves ba jornalista sira iha Palásiu Prezidente Nicolau Lobato, Bairru Pité, segunda ne’e, hafoin enkontru ho Xefe Estadu.

Nia esplika objetivu Pe. Ángel Fernández Artime vizita Timor atu haree atividade sira Salezianu nian no haktuir katak Komunidade Salezianu kontribui buat barak ba Timor, liu-liu involve luta ba independénsia Timor no dezenvolvimentu ba foinsa’e sira.

Reitór-Mor to’o iha aban no sei simu hosi família Salezianu iha Timor iha Aeroportu Internasionál Prezidente Nicolau Lobato, Komoro. Durante estadia iha Timor, Reitór-Mór mós sei hala’o enkontru ho família Salezianu Don Bosco. 

Jornalista: Xisto Freitas

Editora: Rita Almeida

HUSIK IDA HATÁN