ASEAN Aprezenta Hatais Tradisionál

0
117
ASEAN. Foto espesiál

DILI, (TATOLI) – Nasaun membru direitu plenu ASEAN (Association of South East Asean Nation) halo aprezentasaun kultura hatais roupa tradisionál ba públiku iha rezidénsia ASEAN, Farol, domingu hodi promove organizasaun aziátika ne’e.

“Iha mós sira-nia dialogue partner (diálogu ho parseiru), Korea Sul nomós Timor-Leste. Importante horseik ne’e, meius ida para promove sira-nia kultura, ASEAN nian, liu-liu husi hatais nian”, informa Vise-ministra Negósiu Estranjeiru no Kooperasaun, Adaljiza Albertina Xavier dos Reis Magno, ba TATOLI iha sede CPLP (Comunidade dos Países da Língua Portuguesa), Praia dos Coqueiros, ohin.

Timor-Leste promove tais tradisionál; tais feto no tais mane. “Ne’e furak loos tanba ita hotu hatene katak ita applay (konkore) hela, husu hela atu sai membru ASEAN. Purtantu, ida ne’e hanesan meius ida atu ita bele hamutuk, tanba ASEAN ne’e iha kultura ida katak iha solidariedade maka’as, kultura ida armonia, partilla kultura hamutuk”, esplika governante ne’e.

Magno hatete ne’e hanesan meius ida para sosializa ASEAN, espera katak maluk Timor sira bele kuñese liután ASEAN.

MNEK Vizita Singapura-Indonézia

Ministru Negósiu Estranjeiru no Kooperasaun (MNEK), Aurelio Guterres, vizita traballu ba nasaun membru ASEAN balun hodi hasoru primeiru-ministru Singapura, Lee Ho Sien Loong no Indonézia hasoru ninia omólogu, ministra Retno Marsudi.

Substánsia husi vizita  ne’e hodi introduz MNEK foun bainhira asume kargu iha governu konstitusionál da-hitu ba nasaun viziñu sira, liu-liu ASEAN. Tuir mai nasaun lubuk tan.

“Purtantu ne’e hanesan vizita normál, hanesan ministru negósiu estranjeiru tenke marka nia prezensa bebeik iha rai li’ur para ita mós promove ita-nia rain”, haktuir vise MNEK, Adaljiza Magno

Tuir informasaun Ministru Aurélio Guterres sei fila hikas mai Timor-Leste iha sesta semana ne’e.

Hein Konsensu

Prosesu adezaun Timor-Leste ba ASEAN hein membru sira hanesan Brunnei Darrusalam, Cambodia, Indonézia, Laos, Malázia, Myanmar, Filipina, Singapura, Tailándia no Vietnam nia konsensu.

Dadaun ne’e koko halo tuir kritéria sira ne’e hotu maibé sé mak deside? Membru hotu-hotu halo konsensu.

“Purtantu, ita hein konsensu husi rai ASEAN hotu. Bainhira sira dehan entaun ita tama, sira hateten katak ita tenke hasa’e ita-nia rekursu umanu, ita tenke fó treinu barak ba ita-nia funsionáriu públiku sira. Kuandu sira dehan ita preparadu tama, ita tama”, akresenta hodi subliña: “Obstakúlu la iha, ita hein de’it sira-nia konsensu”.

Kona-ba rezultadu avaliasaun husi ekipa tékniku husi organizasaun aziátika ho lema katak Vizaun Ida, Misaun Ida, Komunidade Ida ne’e, ligadu ho adezaun Timor-Leste nian, governante ne’e informa katak rezultadu avaliasaun seidauk publika.

“Ida ne’e ami seidauk hatene rezultadu, ida ne’e, sira publika ita hotu-hotu hatene”, konklui.

Entretantu, sai membru ASEAN iha rekizitu importante no fundamentál tolu ne’ebé sai hanesan baze ba avaliasaun. Rekizitu ne’e haree husi pilár polítika no seguransa, sosiál no kultura inklui pilár ekonomia.

Jornalista: Rafy Belo

Editora: Rita Almeida

HUSIK IDA HATÁN