APFTL Konsege Ezekuta Fundu Husi Parseiru

0
125
Prezidente APFTL, Zaulino Gomes da Silva. Foto: APFTL

DILI (TATOLI)-Alumni Parlamentu Foinsa’e Timor-Leste (APFTL) konsege ezekuta orsamentu ho valór dolár 205,619.00, mai husi parseriu nasionál nomós internasionál sira ho montante aprovadu dolár 252,749.75.

Alumni Parlamentu Foinsa’e Timor-Leste (APFTL). Foto: APFTL

Husi gastus ne’ebé mak iha, APFTL konsege halo poupansa hodi hamosu balansu ho montante dolár 47,130.75 no osan ne’e fó fila ona ba kaixa estadu no ba parseiru ne’ebé mak APFTL serbisu hamutuk ezetu fundus husi parseira IFES (Internasionál Foundation For Electoral System) nian ho montante dolár 414.25 mak la entrega hikas ba fali no konsidera hanesan cash ka bolu hanesan insetivu ba APFTL.

Ho montante orsamentu ne’ebé mak iha, uza ba Programa Asaun Anuál (PAA) 2017 nian. Depende ajenda ne’ebe iha, hafoin aprezentasaun, debate no votus apresiasaun ba relatóriu anuál 2017. Asembleia sei kontinua ho debate, diskusaun no aprovasaun ba Planu Asaun Anuál 2018. Hodi sai hanesan matadalan ba Korpu Ezekutivu hala’o kna’ar tuir vizaun no misaun organizasaun nian.

Prezidente APFTL, Zaulino Gomes da Silva haktuir ba Ajénsia TATOLI via telefone, katak atividade Assembleia Jerál Anuál APFTL ba dala III, iha salaun Ministeriu Soliedaridade Sosiál (MSS), Caicoli, Dili Timor-Leste, ohin, sesta, katak atividade ne’e hala’o ho objetivu atu apresia relatóriu anuál 2017 ninian liuhusi asembleia.

Inklui, debate no diskusaun ba Planu Asaun Anuál 2018 nian ne’ebé hetan aprovasaun iha asembleia, atu hola desizaun ba organizasaun ninia atividade hanoin atu halo iha 2018.

“Insentivu ne’ebé organizasaun hetan atu apoiu atividade operasionál organizasaun ninian,” reforsa tan prezidente APFTL, Zaulino Gomes hodi esplika kona-ba osan husi parseiru IFES, ne’ebé la fó fila.

Zaulino mós relata katak iha asembleia ne’e, Sekretáriu Estadu Juventude no Traballu, Nívio Magalhães hato’o mensajen ba sira katak tenke kontinua nafatin hala’o serbisu ba joven sira, tuir saida mak APFTL iha hodi nune’e bele sai ezemplu mós ba ema hotu-hotu, ba organizasaun hotu-hotu.

Nia apoiu 100% atu serbisu hamutuk hanesan parseiru ida iha 2018 ne’e.“Mensajen ne’e hanesan motivasaun ida mai ami, ami tenke halo ami-nia servisu sira no halo atividade ba maluk foinsa’e seluk ne’ebé mak la hetan oportunidade ba atividade sira,” nia haktuir.

Ne’e hanesan esperansa ida ba APFTL katak la mesak inklui mós joven sira. Sira-nia mensajen no motivasaun sira ne’e hanesan forsa ida ba APFTL hodi halo serbisu di’ak liutan ba foinsa’e sira.

“Ne’e esperansa ida mai ami katak apoiu ne’e la’ós apoiu ho osan, lae, apoiu palavra (liafuan) motivasaun sira, atu enkoraja ami-nia espíritu hodi kontinua hala’o serbisu,” nia konklui.

Entretantu, partisipa iha Asembleia mak Sekretariu Estadu Juventude no Traballu (SEJT), Nívio Magalhães, Diretor Nasionál Juventude SEJT, David Tomas de Deus, Membru APFTL périodu dahuluk no périodu daruak, membru Parlamentu Foinsa’e Nian (PFN) no observadór nasionál no internasionál inklui media sira.

(Jornalista: Rafy Belo)

(Editór : Manuel Pinto)

HUSIK IDA HATÁN