AMP Sei Deside Plataforma Koligasaun Hafoin PR Dekreta Loron Eleisaun

0
263
Deputadu Bankada CNRT, Dionísio Babo Soares. Foto António Gonçalves.

DILI, (TATOLI) – Deputadu Bankada Kongresu Nasionál Rekonstrusaun Timor (CNRT-sigla portugés)), Dionísio Babo, hateten bloku Aliansa Maioria Parlamentár (AMP) sei deside plataforma ba koligasaun hafoin Prezidente Repúblika (PR), Francisco Guterres Lú Olo, dekreta loron ba eleisaun antesipada.

“Ita hein Prezidente Repúblika dekreta loron eleisaun mak foin ita ba rejista, ita labele halo rejistu atu formaliza enkuantu seidauk iha loron eleisaun antesipada”, tenik ba jornalista sira iha Parlamentu Nasionál (PN), ohin.

Hodi hatutan iha proposta rua atu AMP diskute, ida mak halo plataforma koligasaun post eleitorál (hafoin eleisaun antesipada akontese) ne’ebé partidu tolu ba rejista ketak-ketak maibé iha nafatin koligasaun no seluk tan mak plataforma koligasaun pre-eleitorál (antes eleisaun antesipada akontese) ne’ebé partidu tolu ne’e rejista ho lista únika.

Nune’e nia dehan tan sei iha reuniaun alargada ida semana ne’e, hafoin bloku AMP sira sei deside forma saida mak partidu tolu ne’e sei la’o ba eleisaun antesipada. “Semana ida ne’e sei deside, hafoin sei fó hatene ba públiku”.

Antes ne’e, hodi hakotu impase polítika iha rai laran, iha loron 26 janeiru foin lais ne’e, PR deside disolve PN no sei dekreta loron ba eleisaun antisipada iha tempu badak.

Entretantu, partidu tolu kompostu husi CNRT, Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) asina plataforma polítika bankada partidu polítiku PN iha loron 12 outubru 2017 ho naran Aliansa Maioria Parlamentár (AMP).

Plataforma koligasaun ne’e akontese fulan haat hafoin eleisaun parlamentár iha loron 22 jullu 2017 no membru deputadu foun lejislatura dahaat simu posse iha loron 5 setembru 2017.

Jornalista: Julia Chatarina

Editora: Rita Almeida

HUSIK IDA HATÁN