AMP Prontu Fó Solusaun Ba Situasaun Polítika Nasionál

0
286
Kay Rala Xanana Gusmão (Klaran) Taur Matan Ruak (los) ho José Naimori Bucar (Karuk)

DILI (TATOLI)—Xefe Bankada Partidu Libertasaun Popular (PLP), Fidelis Magalhães, afirma Aliansa Maioria Parlamentár (AMP) prontu atu fó solusaun ba situasaun polítika Nasionál.

“Problema impasse polítiku ne’ebé akontese daudauk nee tanba governu minoritáriu laiha apoiu maioria parlamentár. AMP mak iha kondisoens hodi garante estabilidade governativa nu’udar xave ba prosesu dezenvolvimentu Nasionál . AMP komprometidu atu fó solusaun lalais ba funsionamentu estadu ba povu nia moris,” Fidelis Magalhães informa lia ne’e jornalista sira liuhosi konferénsia imprensa ne’ebé hala’o iha Parlamentu Nasionál, Tersa (09/01).

Nia dehan solusaun ne’e mak AMP sei fó liu husi dalan sira hanesan tuir mai; Formasaun governu; Aprovasaun programa ne’ebé di’ak liu ba povu; Aprovasaun Dekretu Lei kona-ba orgánika governu; Aprovasaun Orsamentu Jerál Estadu 2018.

“AMP kompremetidu atu finaliza prosesu sira iha leten, másimu fulan ida nia laran,” nia promete.

 Hatán kona-bá issue Eleisaun Antisipada (EA), alumni Harvard University ne’e dehan, EA la’ós desizaun ne’ebé di’ak ba dezenvolvimentu Nasionál  ho razaun hirak tuir mai: EA sei perturba povu nia atividade normal ba moris di’ak; Seidauk iha lei ida mak regula kona-ba EA; Laiha razaun konstitusionál atu disolve Parlamentu Nasionál hodi hakat ba EA; Laiha orsamentu própriu ba EA; Laiha Orsamentu Jerál Estadu 2018 hodi sustenta povu nia moris, liu husi, saláriu ba funsionáriu públiku, PNTL, F-FDTL, Veteranus, Idozus, selu projetu sira, durante tinan 2018; Laiha esperiénsia EA dezde estadu RDTL eziste, maski hasoru krize polítiku iha 2006.

“EA sei hamosu presedente ne’ebé ladi’ak ba vida polítika iha futuru;  Karik rezultadu EA sei lori ita ba situasaun impase polítiku hanesan agora, sera ke ita tenke halo beibeik Eleisaun Antisipada?,” Fidelis duvida.

“Atu garante no hasees hosi risku no implikasaun hirak ne’e ba povu no estadu maka AMP reitera nia prontidaun hodi assume responsabilidade governativa ho lideransa Kay Rala Xanana Gusmão ho Taur Matan Ruak bainhira Prezidente da Repúblika fó fiar atu kaer VIII Governu Konstitusionál.”

Maski nune karik Prezidente da Repúblika decide EA maka AMP prontu atu partisipa no garante sei hodi vitória ba povu tomak hamutuk ho Kay Rala Xanana Gusmão, Taur Matan Ruak, José Naimori Bucar no entidade polítika seluk ne’ebé hanoin hanesan ho AMP hodi defende Konstituisaun RDTL.

(Jornalista : Julia Chatarina)

(Editór : Manuel Pinto)

HUSIK IDA HATÁN