Alkatiri Lakohi Povu Maioria GOLPUT Iha EA

0
771
Primeiru-Ministru, Marí Alkatiri.

DILI (TATOLI)—Primeiru Ministru Sétimu Governu, Mari Alkatiri husu atu la bele hili GOLPUT (abstensaun/La Vota)  iha Eleisaun Antisipada (EA) hanesan eleisaun lejizlativu 2017 ne’ebé liu ona.

“Ema hotu kontente hakarak vota, ida ne’e pozitivu ona, maibé labele tan iha abstensaun tanba foin daudauk abstensaun boot tebes no ema la vota mós barak,” Primeiru Ministru, Mari Alkatiri bolu atensaun iha diálogu ho komunidade Rejiaun Autónomu Enklave Oe-cusse Ambenu (RAEOA) iha Salaun Alfándega Paleban, foin lalais ne’e.

Evita partisipasaun iha eleisaun mínimu, nu’udar Primeiru Ministru, Alkatiri husu ba autoridade Oe-cusse, espesiálmente no jeralmente territóriu Timor laran tomak atu hatudu sira nia responsabilidade liuhosi dalan mobiliza votante sira hodi hakat ba sentru votasaun iha loron vota ba eleisaun antisipada.

Tuir Nia eleisaun nu’udar eventu demokrasia ida ne’ebé povu hili nia direitu, tanba ne’e autoridade sira tenke responsabiliza ida ne’e.

“Ita seidauk hatene sá fulan mak sei realiza eleisaun, tanba presiza preparasaun hosi órgaun eleitorál hanesan Komisaun Nasionál Eleisaun (CNE) ho Sekretáriu Tékniku Administrasaun Eleitorál (STAE). Maibé governu hakarak lais di’ak liu,” Alkatiri hatete.

Biar nune’e, Governu sei respeita nafatin tékniku sira hanesan CNE ho STAE nia desizaun ba realizasaun loron eleisaun Antisipada, governu konxiente katak polítika sira só deside, maibé tenke hatene mós tékniku, kuandu la konsidera malu ne’e ladi’ak.

“Eleisaun Antesipada tenke sai eleisaun ne’ebé transparente liu atu ema labele iha dúvida.

Iha parte seluk rezultadu eleisaun tuir dadus Komisaun Nasionál Eleisaun (CNE) iha eleisaun lejizlativu 2017, partidu KHUNTO 6.40% ho total votu 36.547 hetan kadeira 5 ba Parlamentu Nasionál (PN).

Partidu CNRT iha votu hamutuk 167.345, 29.50% no iha kadeira 22 ba PN. Partidu Fretilín 168.480, 29.70% no iha kadeira 23 ba PN.

Partidu Libertasaun Popular (PLP), rekolla votu 60.098, 10.60% no iha kadeira 8 ba PN. Partidu Demokrátiku (PD) iha votu 55.608, 9.80% iha kadeira 7 ba Parlamentu Nasionál.

Total eleitór iha eleisaun lejizlativu 2017 hamutuk 565.973 hosi populasaun Timor-Leste um millaun ital.

(Jornalista : Zezito Silva)

(Editór : Manuel Pinto)

HUSIK IDA HATÁN