Alkatiri Agradese Kooperasaun Mariña Amerikanu

0
83
Primeiru-Ministru, Marí Alkatiri, akompanha husi Vise Ministra Edukasaun no Kultura (MEK), Lourdes Bessa nomós embaixadora EUA ba Timor-Leste, Kathleen M. Fitzpatrick halo lansamentu ba Edifísiu Polivalente Eskola Bázika Liquisa. Foto GPM: Samuel

LIQUISA (TATOLI) – Primeiru-Ministru, Marí Alkatiri fó agradese ba Navál Seabees Estadus Unidus Amérika (EUA) tanba fó ona atensaun ba Timor-Leste (TL) iha área edukasaun.

“Ha’u kontente tebes ohin bele mai hamutuk ho Embaixadora Seabees Estadus Unidus Amérika nian atu simu infraestrutura ida ne’ebé di’ak hanesan kooperasaun ho mariña amerikana no governu Timor-Leste lokál no nasionál”, Mari Alkatiri afirma iha nia intervensaun foin lais iha inaugurasaun edifísiu Polivalente, Eskola Bázika Liquisa.

Hodi dehan, edukasaun iha Timor-Leste dezafiu boot, povu barak mak oan seidauk hetan edukasaun tanba ne’e, presiza duni atensaun ho edukasaun ida ne’ebé iha kualidade.

Ho ida ne’e, kooperasaun husi parseiru hanesan ajuda boot ida ba governu TL, atu bele dudu liután harii kondisaun ba sistema edukasaun no seluk tan.

Governu dahituk sei halo esforsu tomak hodi harii infraestrutura edukasaun iha TL tomak ne’ebé ohin loron sei defisiente tebes, falta ekipamentu no material, inklui liu-liu rekursu ne’ebé ho kualidade atu bele garante estudante sira bele hetan formasaun di’ak.

Iha programa governu dahituk nian fó importánsia boot tebes iha edukasaun no saúde maibé importánsia la’ós de’it infraestrutura maibé tenke iha edukasaun ida inkluziva no labele iha diskriminasaun.

Lori governu nia naran, xefe governu ne’e fó parabéns ba Eskola Bázika Liquisa, ba ninia diretór no professor sira hotu tanba simu infraestrutura ne’ebé di’ak, maibé dezafiu mós ba alunu no professor sira hotu atu tau matan ba infraestrutura ida ne’e hanesan ita nia rasik.

Parte seluk, Embaixadora EUA, Kathleen M. Fitpatrick agradese ba NMCB FOUR (Batallaun konstrusaun movel, Seabees, Ministériu Edukasaun (ME) no parseiru seluk tanba kolabora hodi harii edifísiu ida ne’e.

(Jornalista: Julia Chatarina)

(Editór : Manuel Pinto)

HUSIK IDA HATÁN