Alfándega Husik Liman Ba Kontentór Ualu

0
502
Diretór Jerál Alfándega, Minstériu Finansa, José António Fátima Abílio. Foto/Egas Cristovão.

DILI (TATOLI)-Diretór Jerál Autoridade Aduaneira (AA), José António Fátima Abílio, hatete iha momentu órgaun polisiál kriminál halo intervensaun ba esportasaun matéria prima ba medikamentu iha kontentór ualu ne’e, Autoridade Aduaneira husik liman.

“Tanba iha forsa ona, iha instituisaun ida ne’ebé iha termu kontrolu kona-ba droga no buat seluk, sira mak iha podér liu, sira mak halo intervensaun ona ami husik no lori prosesu ne’e bá, ita-boot sira presiza informasaun haruka karta ofisiál mai ami bele fornese”, katak José iha edifísiu Autoridade Aduaneira, ohin.

Mas lafó ho verbalmente tanba pedidu tenke mai ho ofisiál tanba bainhira halo intervensaun loke kontentór ne’e husi Polísia Marítima, Alfándega husik liman.

“Ne’e Alfándega sei la responsabiliza tanba sé mak hatene ita bá ho intensaun di’ak ka la’e? Nia bele infiltra buat ruma iha ne’ebá tau sala fali ba Alfándega ne’e la’e. Sira foti ona no ita hakarak halo termu entrega ne’e, entrega ba sira mas atu saida mak iha laran ami la responsabiliza tanba ami foin halo teste ba ida para hasai sasán ne’e tula”.

Enkuantu teste ne’e seidauk halo ba kontentór hitu seluk no hetan ona apreensaun inklui nutrisaun ba ikan no boek hamutuk sia no daudaun ne’e tau ona iha edifísiu Polísia nian.

Tanba sei iha hela prosesu investigasaun mak hein de’it desizaun finál husi Tribunál nian.

Sobre termu identidade rezidénsia (TIR) ne’ebé fó husi Tribunál Distritál Dili, José esplika katak fó ba nahkoda ró no pesoál ne’ebé serbisu hamutuk ne’ebé mak atu tula matéria prima ba Indonézia, maibé Alfándega seidauk hetan notifisasaun husi Ministériu Públiku.

“Alfándega koopera embora seidauk iha protokolu ida ho Ministériu Públika no PSIK bainhira iha notifikasaun ami bá tanba ita instituisaun Estadu no serbisu ba nasaun ida ne’e”.

Diretór Jerál ne’e relata bainhira kompañia ne’e husu atu halo esportasaun AA mós estabelese kontaktu liuhusi intelijénsia Alfándega nian ho indonézia.

“Tanba Indonézia seidauk fó lista ida mai dehan matéria prima hanesan ne’e labele importa, ita seidauk iha lei kona-ba anti droga para proibida sasán ne’e labele importa ou esporta. Karik husi Polísia sira ofisialmente sira iha akordu ida dehan matéria prima ne’e labele importa bá Indonézia sira hatudu mai mas tuir ha’u hatene ko’alia kona-ba importasaun no esportasaun ne’e beacukai Indonézia nia partner serbisu hamutuk mak Alfándega”.

Jornalista : Maria Auxiliadora

(Editór : Manuel Pinto)

Notísia ne’ebé relasiona :

http://www.tatoli.tl/2018/01/kontentor-sia-neebe-hetan-apreensaun-husi-orgaun-polisial-ida-hahan-ba-ikan-no-boek/

HUSIK IDA HATÁN