ADB Fó Impresta Tan Osan Hadi’a Estrada Baukau-Vikeke

0
984
Primeiru-Ministru, Marí Alkatiri.

DILI, (TATOLI) – Banku Dezenvolvimentu Azíatiku (ADB) fó impresta tan osan kuaze milloen 50 resin ba Governu hodi hadi’a estrada hosi diresaun Munisípiu Baukau to’o Vikeke.

Primeiru-Ministru, Marí Alkatiri, hateten parte rua halo ona negosiasaun kle’ur tanba ne’e  sei asina akordu  iha marsu 2018.

ʺIha mós projetu foun, fulan marsu estrada entre  Baukau no Vikeke no fatin selukʺ, dehan Alkatiri hafoin enkontru ho dirijente ADB iha Palásiu Governu, ohin. Maibé Xefe Governu la esplika detallu projetu estrada foun ne’e bainhira maka implementa.

Sorumutu ne’e, Governu no ADB diskute kona-ba prosesu manutensaun estrada diresaun Dili to’o Glenu munisípiu Ermera no Dili to’o munisípiu Likisa ne’ebé atrazu.

ʺSira (ADB) esplika katak problema manutensaun atrazu tanba  pagamentu atrazuʺ, tenik. Tanba ne’e Governu tenta semana oin atu halo ona pagamentu ba divida hodi aselera prosesu manutensaun estrada rua.

ʺOsan iha maibé sistema maka la funsiona tanba burokrasia maka barak buka atu hamenus burokrasiaʺ, hatutan.

Entretantu iha mandatu sestu Governo, ADB fó impresta ona millaun 76 ba  governo hodi reabilita estrada diresaun Baukau to’o Lautem, Maubara, Karimbala munisípiu Likisa,  no Atabae – Batugade munisípiu Bobonaro.

Governu Sei Funsiona ho Di’ak

Okaziaun ne’e, Xefe Ezekutivu, hatutan governo sei funsiona ho di’ak to’o formasaun oitavu Governo konstitusionál.

ʺGovernu ne’e governu Timor-Leste, governu konstitusionál la’ós governu saidaʺ, katak tan. Maske públiku bolu ona setimu governu hanesan governu jestaun.

ʺAmi halo duni jestaun ba tusan ne’ebé husik mai ami, ba má jestaun ne’ebé husik ba ami mak halo dadauk ne’eʺ, hatutan.

Tuir lei governu jestaun sei akontese bainhira tama ona iha períodu kampaña eleitorál ba eleisaun antesipada. ʺKuando tama ona iha períodu maka tama ona iha governu jestaunʺ, hateten.

Jornalista: Agapito dos Santos

Editora: Rita Almeida

HUSIK IDA HATÁN