Abílio Araújo Prefere Diálogu entre Jerasaun 1974-1975 Hodi Rezolve Inpase Polítika

0
132
Enkontru entre eis líder rezisténsia jerasaun 1974-1975, Abilio Araújo no Prezidente Repúblika, Francisco Guterres Lú Olo iha Palásiu Prezidente Nicolau Lobato, ohin. Imajen Mídia Palásiu PR.

DILI, (TATOLI) – Eis líder rezisténsia jerasaun 1974-1975, Abilio Araújo, hateten dalan atu rezolve inpase polítika atuál presiza iha diálogu entre líder rezisténsia jerasaun 1974-1975.

“Ha’u manifesta ha’u nia opiniaun ba Xefe Estadu atu kria diálogu ho jerasaun fundadór Nasaun mai hosi tinan 1974-1975 atu bele iha intendementu ida di’ak hodi hakotu atuál inpase polítika”, hato’o Abílio ba jornalista sira iha Palásiu Prezidente Nicolau Lobato Bairru Pité, kinta ne’e hafoin soru-mutu ho Prezidente Repúblika, Francisco Guterres Lú Olo, kona-ba situasaun polítika rai laran.

Tuir prátika polítika, nia haktuir jerasaun 74-75 bele iha diverjénsia ka la intende malu maibé krítika no auto-krítika maka sai solusaun ba problema. “Ha’u espera katak bele iha diálogu hodi bele fó eransa di’ak ba jerasaun foun sira ne’ebé sei troka ami nia fatin”, afirma.

Liuhusi diálogu, tuir Abílio bele kria kondisaun atu transmite podér hosi jerasaun tuan ba jerasaun foun hodi asumi fali responsabilidade ukun.

“Ha’u fiar katak liuhusi diálogu entre ami jerasaun 74-75 bele hetan intendementu ida, atu bele iha tinan-lima ne’e ba oin prepara halo transmisaun poder ba sira ne’ebé tuir ami”, hatutan.

Tuir nia haree inpase polítika no situasaun investimentu ekonómiku iha Timor-Leste la favoravél ba Timor Leste. Tan ne’e dezisaun saida de’it maka Prezidente Repúblika foti hodi rezolve krize polítika, nia parte apoiu totalmente.

Jornalista: Xisto Freitas

Editora: Rita Almeida

HUSIK IDA HATÁN